काठमाडौं । नेपालको माथिल्लो वायुमण्डलमा पश्चिमी न्यूनचापीय प्रणालीको आंशिक प्रभाव पर्दा देशका विभिन्न भागको मौसममा परिवर्तन आएको छ। यसकै प्रभावस्वरूप आज देशका पहाडी तथा हिमाली भेगमा वर्षा र हिमपातको सम्भावना रहेको जल तथा मौसम विज्ञान विभागले जनाएको छ।
मौसम पूर्वानुमान महाशाखाका अनुसार दिउँसो विशेषगरी कोशी, बागमती र गण्डकी प्रदेशका पहाडी तथा हिमाली भूभागमा मौसम साधारणतया बदली रहनेछ। बाँकी प्रदेशका पहाडी तथा हिमाली क्षेत्रमा भने आंशिक बदली हुनेछ।
यी तीन प्रदेशका केही स्थान तथा अन्य प्रदेशका एक–दुई स्थानमा मेघगर्जन र चट्याङसहित हल्का वर्षा हुने सम्भावना रहेको छ। साथै, सोही क्षेत्रका उच्च पहाडी तथा हिमाली भेगमा हल्का हिमपातसमेत हुने प्रक्षेपण गरिएको छ।
तराईका जिल्लाहरूमा दिउँसोको समयमा मौसम मुख्यतया सफा रहने भए पनि बिहानपख केही स्थानमा हुस्सु लाग्ने जनाइएको छ।
आज रातिको समयमा पनि देशका हिमाली भेगमा मौसम साधारणतया बदली रहनेछ। पहाडी क्षेत्रमा आंशिक बदली हुनेछ भने तराईको मौसम प्रायः सफा रहनेछ। यद्यपि, रातिको समयमा तराईका केही सीमित स्थानमा तुवाँलो लाग्न सक्ने अनुमान छ।
महाशाखाको पछिल्लो बुलेटिनअनुसार राति कोशी, गण्डकी र कर्णाली प्रदेशका उच्च हिमाली भूभागका एक–दुई स्थानमा मेघगर्जनसहित हल्का वर्षा र हिमपातको सम्भावना कायमै रहनेछ।
मौसममा आएको परिवर्तनसँगै चिसोबाट बच्न आवश्यक सतर्कता अपनाउन सम्बन्धित सबैमा अनुरोध गरिएको छ।
