काठमाडौं । नेपाली सेना ले आफ्नो स्थापनाको २६३ औँ वार्षिकोत्सव आइतबार टुँडिखेल मा विभिन्न कार्यक्रम आयोजना गरी मनाएको छ ।
महाशिवरात्रि तथा सेना दिवसको अवसरमा आयोजित विशेष समारोहमा सैन्य परेड, शस्त्राभ्यास, तोप बढाइँ, कवाज तथा विविध सांस्कृतिक कार्यक्रम प्रस्तुत गरिएको थियो । समारोहमा सेनाका २ हजार ५ सय २४ सैनिकले विशेष कला प्रदर्शनी, मार्चपास, हेलिकोप्टरबाट पुष्पगुच्छा अर्पण तथा राइफल र तोपबाट शिवरात्रि बढाइँ प्रस्तुत गरेका थिए ।
त्यसैगरी सैन्य टोलीले विभिन्न रणकौशल, मार्चपास तथा परम्परागत वेशभूषा झल्कने नृत्य, कला र सङ्गीतको प्रस्तुति दिएको थियो । साथै शान्ति मिसनमा प्रयोग हुँदै आएका सवारी साधन, उपकरण र हतियारसमेत प्रदर्शन गरिएको थियो ।
समारोहमा प्रमुख अतिथि राष्ट्रपति रामचन्द्र पौडेल, उपराष्ट्रपति रामसहाय प्रसाद यादव, प्रधानमन्त्री सुशिला कार्की लगायत नेपाल सरकारका उच्चपदस्थ अधिकारीहरूको सहभागिता रहेको थियो ।
