काठमाडौं । नेपाली कम्युनिष्ट पार्टी (नेकपा) का संयोजक एवं पूर्वप्रधानमन्त्री पुष्पकमल दाहालले आगामी निर्वाचनको माहोल आफ्नो पार्टीतर्फ क्रमशः बढ्दै गएको दाबी गरेका छन् । बुधबार पोखरामा आयोजित पार्टी कार्यकर्ता भेलालाई सम्बोधन गर्दै उनले विपक्षी राजनीतिक दलहरुले समेत निर्वाचनको माहोल नेकपाको पक्षमा गएको निष्कर्ष निकाल्न थालेको जिकिर गरे ।
संयोजक दाहालले प्रत्यक्षतर्फको निर्वाचनमा आफ्नो पार्टीले राम्रो नतिजा ल्याउने संकेत देखिएको उल्लेख गर्दै नेता तथा कार्यकर्तालाई थप सक्रिय भएर प्रचार–प्रसारमा जुट्न निर्देशन दिए । उनले पार्टीलाई सबैभन्दा उत्कृष्ट राजनीतिक शक्तिका रूपमा स्थापित गर्ने लक्ष्यसहित संगठित रूपमा अघि बढ्न आग्रह गरे ।
उनका अनुसार केही नयाँ भनिएका राजनीतिक दलहरुले नयाँ क्षेत्रमा सीमित प्रभाव देखाए पनि पुराना राजनीतिक आधार क्षेत्रहरूमा भने त्यस्तो प्रभाव देखिन नसकेको बताए । उनले पुराना राजनीतिक शक्ति र संगठनात्मक आधार भएका दलहरूसँग नै वास्तविक प्रतिस्पर्धा हुने धारणा राखे ।
दाहालले आगामी निर्वाचनमा नेकपा, नेपाली कांग्रेस, नेकपा (एमाले) र राष्ट्रिय स्वतन्त्र पार्टीबीच कडा प्रतिस्पर्धा हुने उल्लेख गर्दै लोकतान्त्रिक प्रतिस्पर्धालाई सकारात्मक रूपमा लिनुपर्ने बताए । उनले स्वस्थ राजनीतिक प्रतिस्पर्धाबाट नै मुलुकको लोकतन्त्र सुदृढ हुने धारणा व्यक्त गरे ।
त्यस्तै उनले आगामी १०–१५ दिनभित्र आफ्नो पार्टीले थप जनसमर्थन प्राप्त गर्दै निर्वाचनको माहोल अझ बलियो बनाउने विश्वास व्यक्त गरे । नेकपा नयाँ सोच, स्पष्ट भिजन र परिवर्तनको एजेण्डा बोकेको पार्टी भएको उल्लेख गर्दै हजारौँ युवाहरु पार्टीप्रति आकर्षित भएको पनि उनले बताए ।
उनले देशको राजनीतिक स्थायित्व, आर्थिक विकास र सुशासनका लागि स्पष्ट नीति तथा प्रतिबद्धता आवश्यक रहेको धारणा राख्दै नेकपा त्यस दिशामा अघि बढिरहेको बताए । जनताको दैनिक जीवनसँग प्रत्यक्ष जोडिएका मुद्दा — रोजगारी सिर्जना, शिक्षा, स्वास्थ्य, कृषि र पूर्वाधार विकास — लाई केन्द्रमा राखेर निर्वाचन अभियान सञ्चालन गर्ने उनको भनाइ थियो ।
दाहालले युवापुस्ताको सक्रिय सहभागिताले राजनीतिक संस्कार परिवर्तन हुन सक्ने बताउँदै युवालाई नेतृत्व तहसम्म ल्याउन पार्टीले प्राथमिकता दिएको उल्लेख गरे । साथै उनले सामाजिक सद्भाव, राष्ट्रिय एकता र लोकतान्त्रिक मूल्य–मान्यताको संरक्षणमा सबै राजनीतिक शक्तिहरू जिम्मेवार हुनुपर्ने पनि बताए ।
कार्यक्रममा सहभागी नेता तथा कार्यकर्ताहरूले आगामी निर्वाचनलाई केन्द्रित गर्दै संगठन विस्तार, जनसम्पर्क अभिवृद्धि तथा प्रचार–प्रसारलाई प्रभावकारी बनाउन सुझाव दिएका थिए । पार्टीले देशभर विभिन्न कार्यक्रममार्फत जनतासँग प्रत्यक्ष संवाद बढाउने योजना बनाएको पनि कार्यक्रममा जानकारी गराइएको थियो ।
