काठमाडौं । काठमाडौंबाट ओखलढुंगाको रगनीतर्फ जाँदै गरेको यात्रुबाहक बस रामेछापको मन्थली नगरपालिका–६ क्षेत्रमा तामाकोशी नदीमा खसेपछि उद्धार कार्य तीव्र बनाइएको छ। दुर्घटनामा ठूलो मानवीय क्षति भएको आशंका गरिएको छ।
घटनापछि स्थानीयवासी, नेपाल प्रहरी, सशस्त्र प्रहरी बल तथा अन्य सुरक्षाकर्मीहरू घटनास्थलमा पुगेर खोज तथा उद्धार कार्यमा खटिएका छन्। नदीको बहाव र भौगोलिक जटिलताका कारण उद्धार कार्य चुनौतीपूर्ण बनेको जनाइएको छ।
बसको नम्बर, यात्रु संख्या तथा घाइते र मृतकको यकिन विवरण भने समाचार तयार पार्दासम्म सार्वजनिक भएको छैन। प्रारम्भिक जानकारीअनुसार बस सडकबाट अनियन्त्रित भई नदीमा खसेको हुन सक्ने अनुमान गरिएको छ।
दुर्घटनाबारे थप विवरण संकलन भइरहेको प्रहरीले जनाएको छ। घाइतेहरूको सम्भावित उद्धार तथा उपचारका लागि नजिकका स्वास्थ्य संस्थाहरूलाई तयारी अवस्थामा राखिएको बताइएको छ।
स्थानीय प्रशासनले सर्वसाधारणलाई अफवाह नफैलाउन र आधिकारिक सूचना मात्र विश्वास गर्न आग्रह गरेको छ। दुर्घटनाको कारणबारे विस्तृत अनुसन्धान सुरु गरिने जनाइएको छ।
