काठमाडौं । यस वर्षको राष्ट्रिय प्रजातन्त्र दिवस तीन दिनसम्म भव्य रूपमा मनाइने भएको छ। विसं २००७ फागुन ७ गते नेपालमा राणाशासनको अन्त्य गरी पहिलोपल्ट प्रजातन्त्र स्थापना भएको दिनको सम्झनामा सरकारले आउँदो फागुन ६, ७ र ८ गते विभिन्न कार्यक्रम आयोजना गर्ने निर्णय गरेको हो।
प्रधानमन्त्री सुशीला कार्कीको अध्यक्षतामा सिंहदरबारमा बसेको बैठकले तीन दिन प्रजातन्त्र दिवस मनाउने निर्णय गर्दै मूल समारोह समिति गठन गरेको छ। समितिमा प्रधानमन्त्री अध्यक्ष रहनेछन् भने नेपाल सरकारका मन्त्रीहरू, काठमाडौँ उपत्यकाका सबै नगरपालिकाका प्रमुखहरू, नेपाल सरकारका मुख्यसचिव, प्रधानसेनापति, नेपाल सरकारका सचिवहरू, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका प्रमुख सदस्य रहेका छन्। गृह मन्त्रालयका सचिव मूल समारोह समितिका सदस्यसचिव हुनेछन्।
निर्णयअनुसार तीन दिनसम्म नेपालभर र विदेशस्थित नेपाली दूतावास, कूटनीतिक नियोग तथा वाणिज्य दूतावासहरूमा विभिन्न कार्यक्रम आयोजना गरिनेछ। मूल समारोहको कार्यक्रम काठमाडौँको सैनिक मञ्च र टुँडिखेलमा गरिनेछ।
तीन दिनको कार्यक्रम अवधिभर सांस्कृतिक, शैक्षिक तथा सैनिक प्रदर्शनका कार्यक्रम समावेश हुने छन्। सैनिक मञ्चमा नेपालको सुरक्षा बलद्वारा विशेष प्रदर्शनी हुने तय गरिएको छ। टुँडिखेलमा मुख्य समारोहमा प्रजातन्त्र दिवसको ऐतिहासिक महत्व, राणाशासनको अन्त्य र पहिलो प्रजातन्त्र स्थापनाका उपलब्धिहरूलाई स्मरण गर्ने कार्यक्रम राखिएको छ।
समारोहमा विशेष आमसभाहरू, विद्यार्थी र नागरिक सहभागिता, सांस्कृतिक नृत्य, गीत, नाटक र विभिन्न कला प्रदर्शनीहरू समेत हुनेछन्। यसले देशभर प्रजातन्त्रको मूल्य र महत्वलाई नागरिकसमक्ष प्रवद्र्धन गर्ने विश्वास गरिएको छ।
प्रधानमन्त्री कार्कीले सबै नागरिक, सरकारी तथा गैरसरकारी संस्था, विद्यार्थी र सञ्चार माध्यमलाई सक्रिय सहभागी बन्न आग्रह गरेकी छिन्। कार्यक्रमको व्यवस्थापन, सुरक्षा र सहभागीहरूको सहज पहुँचका लागि विशेष तयारी गरिएको छ।
आयोजनाले केवल ऐतिहासिक स्मरण मात्र नभई वर्तमान र भविष्यका पीढीलाई लोकतन्त्रको महत्व बुझाउने उद्देश्य राखेको आयोजकले जनाएको छ। साथै, विदेशस्थित नेपाली दूतावास र कूटनीतिक नियोगहरूले पनि तीन दिनसम्म आफ्नो मातृभूमिसँगको सम्बन्ध र प्रजातन्त्रको मूल्यलाई प्रवद्र्धन गर्ने कार्यक्रम सञ्चालन गर्नेछन्।
तीन दिनसम्मको भव्य समारोहले नागरिकमा प्रजातन्त्र र लोकतान्त्रिक मूल्यप्रति चेतना जगाउने तथा ऐतिहासिक उपलब्धिलाई स्मरण गर्ने अवसर प्रदान गर्ने अपेक्षा गरिएको छ।
