काठमाडौं । इजरायलमा हमासको आक्रमणमा परी ज्यान गुमाएका कञ्चनपुरका विपिन जोशीको पार्थिव शरीर आज नेपाल ल्याइँदैछ । परराष्ट्र मन्त्रालयका अनुसार, उनको शव फ्लाई दुबईको विमानबाट काठमाडौंस्थित त्रिभुवन अन्तर्राष्ट्रिय विमानस्थलमा दिउँसो अवतरण गर्ने तालिका छ ।
विपिनप्रति श्रद्धाञ्जली अर्पण गर्न प्रधानमन्त्री, मन्त्रीहरू र परराष्ट्र मन्त्रालयका अधिकारीहरू विमानस्थलमा उपस्थित हुने तयारी गरिएको छ । कञ्चनपुरका विपिन जोशी अध्ययनका लागि इजरायल गएका थिए । गत २०२३ अक्टोबर ७ मा हमासले किबुत्ज क्षेत्रमा गरेको आक्रमणका क्रममा उनलाई बन्धक बनाइएको थियो । त्यसयता उनको अवस्था अज्ञात रहेकामा गत असोज २७ गते इजरायली अधिकारीहरूले उनको मृत्यु पुष्टि गरे ।
इजरायल र हमासबीचको युद्धविराम सम्झौतापछि बन्दी साटासाट गर्ने क्रममा हमासले विपिनको भनेर इजरायली सेनालाई शव हस्तान्तरण गरेको थियो । इजरायलस्थित नेपाली दूतावासका अधिकारीहरूका अनुसार, डीएनए परीक्षणबाट शव विपिनकै भएको पुष्टि भयो भने फरेन्सिक जाँचमा अपहरण भएदेखि नै उनको मृत्यु भएको पाइयो ।
विपिनको शव नेपाल ल्याउनुअघि आइतबार इजरायलको राजधानी तेल अवीवस्थित खटिभा ८ को स्मारक र बेनगुरिएन विमानस्थलमा श्रद्धाञ्जली दिइएको थियो । उनको शव रहेको कफिनमा नेपाली झण्डा ओढाइएको छ ।
