काठमाडौं । संघीय संसदको महत्त्वपूर्ण बैठक आज दिउँसो १ बजे बस्दैछ । नयाँ बानेश्वरस्थित संसद भवनमा बस्ने प्रतिनिधिसभाको बैठकका लागि संघीय संसद सचिवालयले सम्भावित कार्यसूची सार्वजनिक गरिसकेको छ । आजको बैठकमा विशेषगरी नागरिकता विधेयक र भूमि सम्बन्धी विधेयकमाथि छलफल र पारित गर्ने तयारी गरिएको छ ।
आजको बैठकको प्रारम्भमै प्रतिनिधिसभाका सचिव हर्कराज राईले ‘नेपाल नागरिकता (दोस्रो संशोधन) विधेयक, २०८१’ का सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गर्नेछन् । यो विधेयक लामो समयदेखि चर्चा र विवादमा रहँदै आएको छ । राष्ट्रिय सभाबाट पारित भएर आएपछि अब प्रतिनिधिसभामा यसमाथि थप प्रक्रिया अघि बढ्नेछ ।
सभामुख देवराज घिमिरेले संयुक्त समितिअन्तर्गतको संसदीय सुनुवाइ समितिमा माननीय सदस्यको नाम हेरफेर गर्ने कार्यसूची रहेको छ । यसले समितिको संरचनामा केही परिवर्तन ल्याउन सक्नेछ ।
बैठकको अर्को महत्वपूर्ण कार्यसूचीका रूपमा भूमि व्यवस्था, सहकारी तथा गरिबी निवारण मन्त्री बलराम अधिकारीले ‘कृषि, सहकारी तथा प्राकृतिक स्रोत समितिको प्रतिवेदनसहितको भूमि सम्बन्धी केही नेपाल ऐनलाई संशोधन गर्ने विधेयक, २०८२’ माथि छलफल गरियोस् भन्ने प्रस्ताव प्रस्तुत गर्नेछन् । छलफल सकिएलगत्तै मन्त्री अधिकारीले उक्त विधेयकलाई पारित गरियोस् भन्ने प्रस्ताव पनि प्रस्तुत गर्ने कार्यसूची रहेको संघीय संसद सचिवालयले जनाएको छ ।
