काठमाडौं । प्रहरीले काठमाडौंका ठमेल र महाराजगञ्ज क्षेत्रमा मध्यरातमा विशेष अप्रेसन चलाएर गुण्डागर्दीमा संलग्न ४७ जनाभन्दा बढी व्यक्तिहरूलाई पक्राउ गरेको छ । गुण्डा नाइके मिलन गुरुङ उर्फ ‘चक्रे मिलन’को जन्मदिन पार्टीमा गुण्डागर्दीमा संलग्न व्यक्तिहरू भेला भएको गोप्य सूचनाको आधारमा प्रहरीले बिहीबार रातभर अप्रेसन चलाएको हो ।
काठमाडौं प्रहरी परिसर र उपत्यका अपराध अनुसन्धान कार्यालयको सादा पोशाकको संयुक्त टोलीले महाराजगञ्जस्थित साम्बाला होटलमा छापा मारी चक्रे मिलनलाई पक्राउ गरेको हो । जन्मदिन मनाउन भेला भएका अन्य व्यक्तिहरूलाई समेत प्रहरीले नियन्त्रणमा लिएको छ । पक्राउ पर्नेहरूको यकिन संख्या खुल्दै गरेको र उनीहरूमाथि थप अनुसन्धान भइरहेको प्रहरीले जनाएकाे छ ।
काठमाडौंका एसएसपी विश्व अधिकारीको नेतृत्वमा खटिएको टोलीले रेस्टुरेन्ट र रात्रि क्लबहरूमा बसेर झैझगडा गर्ने र हप्ता असुल्ने गरेको गुनासो बढेपछि यो अप्रेसन चलाएको हो । उपत्यका प्रहरी कार्यालयका एआईजी टेकबहादुर तामाङले अवाञ्छित गतिविधिमा संलग्न केही व्यक्तिहरूलाई नियन्त्रणमा लिइएको पुष्टि गरे ।
यसअघि चक्रे मिलन २०७४ वैशाख २६ मा पनि महाराजगञ्जबाटै पक्राउ परेर छुटेका थिए । यसैबीच, प्रहरीले बुधबार बिहान ३ बजेतिर ठमेलको नगरकोट दोहोरी साँझबाट गुण्डागर्दीमा संलग्न युवराज गुरुङ उर्फ ‘सानुभाइ’लाई पनि पक्राउ गरेको छ । अर्को समूहसँग झगडा गरेपछि उनलाई नियन्त्रणमा लिइएको हो ।
नुवाकोट घर भई हाल टोखा बस्ने ३३ वर्षीय सानुभाइ प्रहरी इन्काउन्टरमा मारिएका कुमार श्रेष्ठ ‘घैँटे’का सहयोगी थिए । पक्राउ परेका सबैलाई स्क्रिनिङ गरेर थप अनुसन्धान गरिने प्रहरीले जनाएको छ ।
