काठमाडौं । राष्ट्रिय स्वतन्त्र पार्टी (रास्वपा) ले पत्रकार सम्मेलन आयोजना गरी समसामयिक राजनीतिक परिस्थितिमा आफ्नो आधिकारिक धारणा सार्वजनिक गर्ने भएको छ । पार्टीको केन्द्रीय कार्यालय वनस्थलीमा दिउँसो साढे ३ बजे पत्रकार सम्मेलन आयोजना गरिएको हो ।
पार्टी प्रवक्ता मनिष झाका अनुसार, पत्रकार सम्मेलनमा मुख्यतया हालैका राजनीतिक घटनाक्रम, सदनमा पार्टीको भूमिका र निरन्तरको सदन बहिष्कार, तथा रुपन्देही क्षेत्र नम्बर ३ मा हुन लागेको उपनिर्वाचनको तयारीका विषयमा जानकारी गराइनेछ ।
पार्टीले आफ्ना सभापति रवि लामिछानेमाथि राजनीतिक प्रतिशोध साँधिएको आरोप लगाउँदै देशव्यापी रूपमा हस्ताक्षर अभियान सञ्चालन गरिरहेको छ । अभियानको प्रगति र आगामी कार्यक्रमबारे पनि पत्रकार सम्मेलनमा विस्तृत जानकारी दिइने झाले बताए ।
यसका साथै, रुपन्देही-३ मा हुन लागेको उपनिर्वाचनका लागि उम्मेदवार चयन गर्न पार्टीले आवेदन आह्वान गरिसकेको छ । सो उपनिर्वाचनका लागि पार्टीको रणनीति र उम्मेदवार छनोट कार्यविधिको प्रक्रियाबारे पनि सम्मेलनमा प्रकाश पारिने बताइएको छ ।
