विपना थापा मगर, सुनिता घिमिरे
१४ आषाढ, ओखलढुंगा

काठमाडौँ । ओखलढुंगाको चिशंखुगढी गाउँपालिका भदौरेस्थित युवा क्लब र सिद्धिचरण नगरपालिका–१, तलुवास्थित युवा क्लबको संयुक्त आयोजनामा VIN (Volunteers Initiative Nepal) मा हालै नियुक्त भएका जिल्ला कार्य संयोजक लरेन्स लामा र लाइब्रेरियन प्रोक्षणी घिमिरेलाई अबिर र खादा सहित स्वागत तथा सफल कार्यकालको शुभकामना प्रदान गरिएको छ।

कार्यक्रम सिद्धिचरण नगरपालिका–२, निशंखे नरटिका सामुदायिक केन्द्रको सभाहलमा सम्पन्न भएको थियो। कार्यक्रममा सहभागी क्लबका सदस्यहरू, स्थानीय युवाहरू र सरोकारवाला व्यक्तिहरूको उल्लेखनीय उपस्थिति रहेको थियो।

कार्यक्रममा तलुवा युवा क्लबका अध्यक्ष रुपक थापा मगरले नव नियुक्त पदाधिकारीहरूलाई स्वागत गर्दै भन्नुभयो, “उहाँहरूद्वारा प्रस्तुत कार्य क्षमता र उत्साहले हामीलाई प्रेरित गरेको छ। हामी सहकार्य, समन्वय र सहज वातावरणमा योजना अनुरूप काम गर्न सधैं तत्पर रहनेछौं।”
नयाँ पदाधिकारीहरूलाई स्थानीय युवा क्लबहरूका तर्फबाट स्वागत गर्नुका साथै समन्वयात्मक कार्य प्रणालीलाई अझ प्रभावकारी बनाउने आयोजकहरूले जनाएका छन्।