काठमाडौं । संघीय संसद अन्तर्गत प्रतिनिधि सभाको बैठक बस्दैछ । नयाँ बानेश्वरस्थित संघीय संसद भवनमा बिहान ११ बजे सुरु हुने बैठकमा बजेटसँग सम्बन्धित महत्वपूर्ण विधेयकहरू पारित गर्नेदेखि प्रधानमन्त्रीले विदेश भ्रमणबारे सम्बोधन गर्नेसम्मका कार्यसूची तय भएका छन् ।
आजको बैठकमा सरकारले आगामी आर्थिक वर्षको बजेट कार्यान्वयनका लागि अत्यावश्यक मानिएका विधेयकहरूलाई टुङ्ग्याउने तयारी गरेको छ । संघीय संसद सचिवालयका अनुसार, उपप्रधानमन्त्री तथा अर्थमन्त्री विष्णुप्रसाद पौडेलले ‘आर्थिक विधेयक, २०८१’ र ‘राष्ट्र ऋण उठाउने विधेयक, २०८१’ पारितका लागि सदनमा प्रस्तुत गर्नुहुनेछ । यी विधेयकहरू पारित भएपछि सरकारलाई बजेटमा घोषित नीति तथा कार्यक्रमहरू कार्यान्वयन गर्ने बाटो खुल्नेछ ।
यसका साथै, लामो समयदेखि चर्चामा रहेको ‘नेपाल नागरिकता (दोस्रो संशोधन) विधेयक, २०८१’ लाई पनि आजै पारित गर्ने सम्भावित कार्यसूची रहेको सचिवालयका महासचिव पद्यमप्रसाद पाण्डेले जानकारी दिए ।
प्रधानमन्त्री ओली संयुक्त राष्ट्रसङ्घद्वारा आयोजित ‘विकासका लागि वित्तसम्बन्धी चौथो अन्तर्राष्ट्रिय सम्मेलन’मा नेपाली प्रतिनिधिमण्डलको नेतृत्व गर्दै आजै स्पेन प्रस्थान गर्दै छन् । स्पेन प्रस्थान गर्नुअघि उनले आफ्नो भ्रमणको उद्देश्य र महत्वबारे सदनलाई जानकारी गराउनुहुने सम्भावित कार्यक्रम रहेको छ ।
