काठमाडौँ । सरकारको आगामी आर्थिक वर्ष (२०८२/८३) का लागि नीति तथा कार्यक्रम आज संघीय संसद्को संयुक्त बैठकमार्फत प्रस्तुत हुने भएको छ । राष्ट्रपतिको सम्बोधनसहित नीति तथा कार्यक्रम सार्वजनिक गरिने छ ।
राष्ट्रपति रामचन्द्र पौडेलले संविधानको धारा ९५ बमोजिम दिउँसो ३ बजे बस्ने संघीय संसद् (प्रतिनिधिसभा तथा राष्ट्रियसभा) को संयुक्त बैठकमा सरकारको नीति तथा कार्यक्रम प्रस्तुत गर्ने कार्यक्रम तय भएको संघीय संसद् सचिवालयले जनाएको छ । संघीय संसद् सचिवालयका महासचिव पद्यप्रसाद पाण्डेका अनुसार बैठकको सम्भावित कार्यसूची तय भइसकेको छ । प्रतिनिधिसभाका सभामुख देवराज घिमिरेले सांसदहरूलाई दिनको २:४५ भित्र निर्धारित पोशाकमा बैठकस्थलमा आशनग्रहण गरिसक्न आग्रह गरिसकेका छन् ।
यसअघि नै सत्ता साझेदार दलहरूबीच आगामी नीति तथा कार्यक्रमका विषयमा परामर्श सम्पन्न भइसकेको छ । आगामी कार्यक्रमले मुलुकको अर्थतन्त्रलाई चलायमान बनाउने लक्ष्य लिएको छ । विशेष गरी युवा लक्षित योजनाहरू उद्यमशीलता, सीप विकास, स्टार्टअप प्रोत्साहन, व्यावसायिक योजना निर्माण तथा सुशासन प्रवर्द्धनमा केन्द्रित हुने विश्वास लिइएको छ ।
संघीय संसद्ले वैशाख २२ गतेदेखि २८ गतेसम्म नीति तथा कार्यक्रममाथि छलफल गरी पारित गर्ने कार्यतालिका तय गरिसकेको छ । त्यसपछि वैशाख ३० गतेदेखि विनियोजन विधेयकमाथि सिद्धान्त तथा प्राथमिकतासम्बन्धी छलफल सुरु हुनेछ । यो चरणलाई प्रि-बजेट छलफलको रूपमा लिइन्छ ।
नेपालको संविधानअनुसार सरकारले आगामी आर्थिक वर्षको बजेट जेठ १५ गते अर्थमन्त्रीमार्फत संघीय संसद्को संयुक्त बैठकमा प्रस्तुत गर्नुपर्ने व्यवस्था छ । सरकारको नीति तथा कार्यक्रमले समग्र अर्थतन्त्र, युवा सशक्तीकरण र पारदर्शी शासनप्रणालीलाई प्राथमिकतामा राख्ने अपेक्षा गरिएको छ ।
