काठमाडौं । मोरङ जिल्लाको जहदा गाउँपालिका-३ खदरा बस्तीकी २२ वर्षीया दलित महिला सामूहिक बलात्कारको घटनामा परेकी छिन् । मंगलबार बिहान शौच गर्न गएकी ती महिला दिउँसो नजिकैको बाँसघारीमा मुखमा कपडा कोचिएको, हातखुट्टा बाँधिएको र अचेत अवस्थामा फेला परेपछि स्थानीयले उद्धार गरेका थिए ।
उद्धारपछि कोशी अस्पतालको एकद्वार संकट व्यवस्थापन केन्द्रमा भर्ना गरिएकी ती महिलाले साँझ होसमा आएपछि आफूमाथि अपहरण शैलीमा बाँसघारीमा लगेर सामूहिक बलात्कार गरिएको बताएकी छन् । पीडित महिलाको बयानका आधारमा प्रहरीले चार जना अभियुक्तलाई पक्राउ गरेको छ ।
कटहरी गाउँपालिका-२ कदमगछियाकी ५२ वर्षीया शान्ति ऋषिदेवले बाँसघारीमा पीडित महिलालाई देखेपछि गाउँलेलाई बोलाएर उद्धार गरिन् । गाउँलेहरूले प्रहरीलाई खबर गरेपछि घटनास्थलबाट अनुसन्धान सुरु गरिएको हो । मुसहर समुदायको बाहुल्य रहेको खदरा बस्तीमा काखे बच्चासहित बस्दै आएकी ती महिला झिसमिसेमै घरदेखि करिब १५० मिटर टाढा रहेको जुडी खोलामा शौच गर्न गएकी थिइन् ।
उनीलाई उद्धार गर्दा कपडा च्यातिएको अवस्थामा फेला पारिएको थियो भने शरीरभरि नीलडाम देखिएका थिए । अस्पतालले उनको स्वास्थ्यमा सुधार आएको जानकारी दिएको छ । हाल उनलाई विराटनगरस्थित एक आश्रयस्थलमा राखिएको छ ।
मंगलबार प्रहरीले कटहरी गाउँपालिका-२ का १९ वर्षीय मोहम्मद रमजान, १९ वर्षीय सोनुकुमार साह, भारतको अररिया कुशाकट्टाका १९ वर्षीय मोहम्मद गुल्जारलाई पक्राउ गरेको छ । बुधबार बिहान थप एक जना अभियुक्त पक्राउ परेका छन् । मोरङ प्रहरी प्रमुख एसपी नारायण चिमरियाका अनुसार पीडितको बयानका आधारमा सामूहिक बलात्कार पुष्टि भएको छ । थप अनुसन्धान भइरहेको छ ।
