काठमाडौं । नेपालमा टिकटक आधिकारिक रूपमा दर्ता भएको छ । टिकटकले प्रक्रिया पुर्याएर नेपाल सरकारलाई पत्र पठाएको थियो ।
कानुनी प्रक्रिया अनुसार टिकटकले प्रक्रिया पुरा गरेपछि आधिकारिकरुपमा दर्ता भएको सञ्चार मन्त्रालयले जनाएको छ ।
सञ्चार मन्त्रालयका सहसचिव गजेन्द्रकुमार ठाकुरले सामाजिक सञ्जाल व्यवस्थित गर्ने निर्देशिकाबमोजिम टिकटक दर्ता भएको जानकारी दिए ।
नेपालमा टिकटक दर्ता भएसँगै अब टिकटकले नेपालको पर्यटन प्रवर्द्धनमा सहयोग पुग्ने बताइएको छ । यस्तै डिजिटल साक्षरतामा पनि टिकटकले सहयोग गर्ने प्रतिबद्धता जनाएको छ ।
यसअघि प्रचण्ड नेतृत्वको सरकारले नेपालमा टिकटकमाथि प्रतिबन्ध लगाएको थियो । समाजमा विकृति र अराजकता फैलाएको भन्दै प्रचण्ड नेतृत्वको सरकारले २०८० कात्तिक २७ मा टिकटक बन्द गर्ने निर्णय गरिएको थियो ।
तर, ओली नेतृत्वको वर्तमान सरकार गठन भएपछि गत भदौ ६ गते मात्रै टिकटक प्रतिबन्ध फुकुवा भयो । यससँगै नेपालमा आधिकारिक रूपमा दर्ता गरेर टिकटक सञ्चालनमा आएको हो ।
