काठमाडौं । राष्ट्रिय स्वतन्त्र पार्टी (रास्वपा) की सांसद डा.तोसिमा कार्कीले सभापति रवि लामिछाने रिहा भएको भन्दै सरकारले भ्रम फैलाएको आरोप लगाएकी छन् ।
उनले जनताले प्रतिशोधको आँकलन गर्लान् कि भन्ने डरले रवि रिहा भइसके भन्ने भ्रमपूर्ण समाचार तथा सूचना प्रवाह गरेर आम जनसहभागिता तुहाउन खोजेको बताइन् ।
सामाजिक सञ्जालमा लेख्दै उनले सभापति लामिछानेसँग पर्याप्त बयान पनि नलिई नै म्याद थपिरहेको गुनासो गरिन् ।
‘यता थुनामा राखिरहने, अनुसन्धान पनि नगर्ने, पर्याप्त बयान पनि नलिने अनि म्याद चाहिँ थपिरहने । उता जनताले प्रतिशोधको आँकलन गर्लान् कि भन्ने डरले रिहा भइसक्नुभयो भन्ने भ्रमपूर्ण समाचार तथा सूचना प्रवाह गरेर आम जनसहभागिता तुहाउन खोज्ने । वा ! गज्जबको राजनीतिको प्रत्यक्षदर्शी हुँदै छौँ हामी,’ उनले लेखेकी छन्, ‘थुनामै रहेको व्यक्तिलाई छुटिसक्यो भनेर भ्रम नछरियोस् । निष्पक्ष तरिकाले अनुसन्धान र न्यायको प्रक्रिया अगाडि बढाइयोस्। दोषी नछुटोस् निर्दोष नफसोस् ।’
सांसद कार्कीले निष्पक्ष रूपमा अनुसन्धान र न्यायको प्रक्रिया अगाडि बढाउन पनि सरकारलाई आग्रह गरिन् ।
सभापति लामिछाने गत कात्तिक २ गतेदेखि कास्की प्रहरी हिरासतमा छन् ।
