काठमाडौं । प्रमुख प्रतिपक्षी दल नेपाली कांग्रेस र राष्ट्रिय स्वतन्त्र पार्टी (रास्वपा)बीच तीन बुँदे सहमति भएको खुलासा भएको छ । बिहीबार संसद् बैठक सुरु हुनुभन्दा पहिला दुई पार्टीका नेताबीच तीन बुँदे सहमति भएको खुलासा भएको हो ।
रास्वपा नेता शिशिर खनालले नेपाली कांग्रेसका तर्फबाट एक जना र रास्वपाको तर्फबाट एक जना बसेर एउटा समझदारी भएको बताएका छन् । तर, उक्त समझदारीबाट पनि नेपाली कांग्रेस पछि हटेको उनको आरोप छ ।
मोटो समझदारी दुर्भाग्य समाधानमुखी बाटोमा भन्दा पनि इगोको बाटोमा गएको उनले सामाजिक सञ्जालमार्फत भनेका छन् । ‘लागेको आरोपको बारे कम्तीमा पनि पार्टी सभापति तथा गृह मन्त्रीले बोल्न पाउनपर्छ हाम्रो न्यूनतम अडान हो । त्यसबाट आवश्यक परे समिति सम्मको बाटोमा जान सकिन्छ भन्ने थियो,’ उनले अगाडि भनेका छन्, ‘हिजो बिहान नेपाली काँग्रेसका तर्फबाट एक जना र रास्वपाको तर्फबाट एक जना बसेर एउटा “मोटो समझदारी“ बनेको थियो। तर दुर्भाग्य समाधानमुखी बाटोमा भन्दा पनि इगोको बाटोमा गयो ।
बिहान नेपाली कांग्रेससँग समझदारी भए पनि प्रतिनिधि सभा बैठकमा नेपाली कांग्रेसको भूमिकाले नेपाली कांग्रेस समझदारीबाट पछि हटेको खनालको दाबी छ । उनको अनुसार यस्तो थियो सहमति :-
‘हामी सहमत भएको तर नेपाली काँग्रेसले अस्वीकार गरेको तीन बुँदा :-
१. सहकारी संस्थाहरूमा देखिएको सङ्कटको समाधानार्थ संसदीय छानबिन समिति बनाउने ।
२. विगत केही समयदेखि प्रमुख प्रतिपक्षी दल लगायतका सांसदहरूले उठाउनुभएका सहकारी बचतकर्ताहरूको रकम अपचलन तथा दुरुपयोगका
सम्बन्धमा मौजुदा कानुनी र संस्थागत प्रयोजनको तथ्यगत विश्लेषण गर्ने ।
३. अनुचित लाभ लिने व्यक्ति, संस्था र कम्पनीबारे समेत अध्ययन गरी कानुनी कारबाही सम्बन्धी सुझाव र सिफारिस गर्ने ।
