काठमाडौं । रोजगार अनुमति प्रणाली (ईपीएस) अन्तर्गत पानीजहाज निर्माणको कामका लागि भाषा परीक्षामा सहभागी भएका सबैले उत्पादनमूलक क्षेत्रको कामका लागि पनि भाषा परीक्षा दिन पाउने भएका छन् ।
कोरिया सरकारले आवेदन दिएका सबैलाई परीक्षामा सहभागी गराउने निर्णय गरेर नेपाल सरकारलाई जानकारी दिएको हो ।
वैदेशिक रोजगार विभागका महानिर्देशक र कोरियाको मानव संशाधन विभागका अधिकारीहरुबीच सोमबार भएको छलफलमा कोरियाली पक्ष उत्पादनमूलकतर्फ आवेदन दिएका १ लाख ६५ हजारभन्दा बढी सबै आवेदकलाई परीक्षामा सामेल गराउन सहमत भएको हो ।
सिप बिल्डिङतर्फको परीक्षामा सहभागी भएका २१ हजार बढी परीक्षार्थीहरूले आवेदन भरेकोमा उनीहरु समेत यो परीक्षामा सामेल हुन पाउने भएका छन् । यही माग राख्दै इपीएस कार्यालय अगाडि प्रदर्शन गर्ने क्रममा दुई युवाको ज्यान गएको थियो ।
