काठमाडौं । इंग्लीश प्रिमियर लिग फुटबलमा फुल्हमले आर्सनललाई २–१ ले हराएको छ ।
आइतबार राति फुल्हमको मैदानमा भएको खेलको पाँचौ मिनेटमै आर्सनलका बुकायो साकाले पहिलो गोल गरे । तर यसपछि घरेलु टोलीका राउल हिमिनेज र डे कोर्दोभा रिडले एक एक गोल गरेपछि आर्सनल २–१ ले पराजित भयो । लगातार दोस्रो हारसँगै आर्सनलको प्रिमियर लिग उपाधि यात्रामा धक्का लागेको छ ।
प्रिमियर लिगकै अर्को खेलमा गएराति टोटनह्याम हट्सपरले बर्नमाउथलाई ३–१ ले हरायो । गएरातिका खेलहरुपछि प्रिमियर लिगको तालिकामा १९ खेलबाट ४२ अंक जोडेको लिभरपुल शिर्ष स्थानमा यथावत छ ।
एक खेल बढी खेलेको एस्टन भिल्ला समान ४२ अंकसहित दोस्रो स्थानमा छ । तेस्रो स्थानको म्यान्चेस्टर सिटी र चौथो स्थानको आर्सनलको समान ४० अंक छ । प्रिमियर लिग फुटबलमा आज राती लिभरपुल र न्युकासल युनाइटेड भिड्नेछन् ।
