काठमाडौं । अभियन्ता दुर्गा प्रसाईंले सुरु गरेको आन्दोलनविरुद्ध सरकार कठोर रुपमा उत्रिएको छ । पहिलो दिनको प्रदर्शन नै झडपमा परिणत भएपछि शुक्रबार दोस्रो दिन प्रदर्शन नै हुन नदिने रबैयामा सरकार प्रस्तुत भएको हो । शुक्रबार तीनकुनेबाट प्रदर्शन सुरु गर्ने तयारमा आन्दोलनकारीहरु रहेकोमा प्रहरीले बिहानैदेखि धरपकड सुरु गर्यो । त्यस क्रममा प्रहरीले सडकमा हिंड्ने सर्वसाधारणलाई समेत मनपरी ढंगले पक्राउ गर्यो ।
मंसिर ८ अर्थात शुक्रबार आममानिसले सोचेका थिए कि राष्ट्र, राष्ट्रियता, धर्म संस्कृति र नागरिक बचाउ महाअभियानले झन् ठूलो प्रदर्शन गर्ने छन् । बिहीबार साँझ र शुक्रबार बिहान गरी बाहिरी जिल्लाहरुबाट प्रदर्शनमा सहभागी हुन मानिसहरु भित्रिएकाले शुक्रबारको प्रदर्शन झन् ठूलो हुने अपेक्षा आन्दोलनकारीहरुले गरेका थिए । तर, सरकारले उनीहरुलाई एकजुट हुनै नदिने रणनीति लिएपछि प्रदर्शन बिथोलिन पुग्यो ।
काठमाडौं जिल्ला प्रशासनले तिनकुनेमा प्रदर्शन गर्नै नदिने गरी प्रतिबन्ध लगायो भने बिहानैदेखि तिनकुने र त्यस आसपासको क्षेत्रमा ठूलो संख्यामा प्रहरी तैनाथ गरिएको थियो । त्यतिमात्र कहाँ हो र ? तिनकुने आसापसमा दुई तीन जना हिँडेको देखेपछि पक्राउ गर्ने हर्कतमा प्रहरी उत्रिएको थियो । अझै ढाका टोपी र दौरा सुरुवाल लगाएकाहरु प्रहरीका लागि असह्य जस्तै बनेका थिए ।
चिया खान बसेकादेखि काम विशेषले सपरिवार हिँडेकाहरु पनि प्रहरीको कब्जामा परेका थिए । बाटोमा हिड्नेहरुको अनावश्यक शरीर छाम्ने, केरकार गर्ने जस्ता व्यवहार पनि प्रहरीले देखायो । हचुवाको भरमा मनपरी समात्ने र लैजाने गरेकोमा सर्वसाधारणहरु आक्रोशित र अचम्मित बनेका थिए ।
पक्राउ परेका केहीको साथबाट नेपालको झण्डा र आन्दोनलसंग सम्बन्धित केही सामग्री फेला नपरेको पनि होइन । पक्राउ परेकाहरुलाई माइतीघर मण्डलामा बनेको प्रहरीका नयाँ भवनमा राखिएको छ । उनीहरुलाई भेट्न पुगेका राप्रपा प्रवक्ता एवं सांसद ज्ञानेन्द्र शाहीलाई समेत उनीसंग भेट्न प्रहरीले दिएन । शाहीले शान्तिपूर्ण प्रदर्शनमा यति क्रुर दमन यसअघि कहिल्यै नदेखिएको भन्दै आक्रोश व्यक्त गर्नुभयो ।
पसरकारको व्यवहारले सरकार प्रसाईं पक्षको आन्दोलनसँग साँच्चिकै तर्सिएको त होइन ? भन्ने आशंका बढाएको छ । होइन भने असंगठित समूहहरुले थालेको शान्तिपूर्ण आन्दोलनप्रति यति कठोर व्यवहार किन ?
