काठमाण्डौ। सिन्धुलीको बिपी राजमार्गमा सञ्चालन हुने सवारीका साधनहरुलाई सुरक्षा कडाइ गरिएको छ ।
बिहीबार मंसिर ७ गते राजधानी काठमाण्डौमा हुने अभियन्ता दुर्गा प्रसाइँ समुहकोे विरोध कार्यक्रमलाई लक्षित गरी सिन्धुलीको बिपी राजमार्गमा सञ्चालन हुने सवारीका साधनहरुलाई सुरक्षा कडाइ गरिएको हो ।
जिल्लास्थित सुरक्षा निकायले बुधबार र आज विहानैदेखि जनपथ र सशस्त्र प्रहरी परिचालन गरेर बिपी राजमार्गको भिमान, सिन्धुलीमाडी, खनियाखर्क, खुर्काेटलगायतका स्थानहरुमा यातायातका साधनहरुलाई सुरक्षा निगरानी गरिरहेको छ ।
गृह मन्त्रालयको आदेश अनुसार बिपी राजमार्ग हुँदै राजधानी काठमाण्डौ भित्रिने सार्वजनिक तथा निजी सवारीका साधनहरुलाई जनपथ र सशस्त्र प्रहरी परिचालन गरेर सडकमा रोक्ने र सोधपुछ गर्ने जस्ता कार्य भइरहेको छ ।
सवारीका साधनहरुलाई ठाउँठाउँमा रोकेर चेकजाँच गर्दा सास्ती भएको यात्रुहरुले बताएका छन् ।
बिपी राजमार्गमा विगतको तुलनामा राजधानी भित्रिने सार्वजनिक र निजि सवारीका साधनहरुको चाप समेत बढेको र यात्रुहरुको संख्या पनि बढेको ट्राफिक प्रहरीको तथ्यांकले देखाएको छ ।
मंसिर ६ र ७ गते बिहानसम्म सिन्धुलीको बिपी राजमार्गबबाट एघार हजार ८ सय ५४ वटा साना ठुला सवारीका साधनहरु राजधानी काठमाण्डौ तर्फ लागेका छन् ।
