काठमाडौं । एसीसी एसिया कप क्रिकेट २०२३ अन्तर्गत सुपर फोरको अन्तिम खेलमा बंगलादेशले भारतलाई पराजित गरेको छ ।
शुक्रबार राति भएको अन्तिम सुपर फोर खेलमा बंगलादेशले भारतविरुद्ध ६ रनको रोमाञ्चक जीत हात पारेको हो । फाइनलमा पुग्न नसके पनि बंगलादेशले भारतलाई हराउँदै एसिया कपको सुखद् अन्त्य गरेको छ ।
बंगलादेशले दिएको २ सय ६६ रनको लक्ष्य पछ्याएको भारत ४९ दशमलब ५ ओभरमा २ सय ५९ रन बनाएर अलआउट भयो । भारतका लागि ओपनर शुभमन गिलले १ सय २१ रनको शतकीय पारी खेले पनि टोलीलाई जीत दिलाउन सकेनन् ।
बंगलादेशका लागि मुस्ताफिजुर रहमानले ३ तथा तन्जिम हसन र महिदी हसनले समान २/२ विकेट लिए । त्यसअघि टस हारेर पहिले ब्याटिङ गरेको बंगलादेशले निर्धारित ५० ओभरमा ८ विकेट गुमाएर २ सय ६५ रन बनाएको थियो ।
बंगलादेशका लागि कप्तान शाकिब अल हसनले ८५ बलमा ६ चौका र ३ छक्काको सहयोगमा ८० रनको अर्धशतकीय ईनिङ खेले । भारतका लागि शार्दुल ठाकुरले ३ तथा मोहम्मद सामीले २ विकेट लिए । हारका बाबजुत भारत समूह विजेताको रूपमा फाइनल पुगेको छ ।
भारतले उपाधिका लागि आइतबार घरेलु टोली श्रीलंकासँग खेल्नेछ । बिहीबार पाकिस्तानलाई पराजित गर्दै श्रीलंका फाइनल पुगेको हो ।
