काठमाडौं । नेपाली कांग्रेसको केन्द्रीय समिति बैठकमा सोमबार सभापति र महामन्त्रीहरुले जवाफ दिने कार्यक्रम रहेको छ ।
सोमबार दिउँसो ३ बजेदेखि सुरू हुने बैठकमा सभापति शेरबहादुर देउवा र महामन्त्रीद्वय विश्वप्रकाश शर्मा र गगन थापाले केन्द्रीय सदस्यहरूले राखेको धारणामा जवाफ दिनुहुनेछ । गत असार २ गतेदेखि जारी बैठकमा महामन्त्री विश्वप्रकाश शर्माले १० एजेन्डा र अर्का महामन्त्री गगन थापाले वार्षिक कार्ययोजना प्रस्तुत गर्नुभएको थियो ।
ती विषयमा आइतबारसम्म केन्द्रीय सदस्यहरूले आ–आफ्ना धारणा तथा सुझाव प्रस्तुत गरिसकेका छन् । सहमहामन्त्रीहरू तथा पार्टीका पूर्व पदाधिकारीहरुले पनि सोमबार नै बोलिसकेका छन् । केन्द्रीय सदस्यहरूको धारणा तथा सुझावको सोमबार सभापति र महामन्त्रीहरूले जवाफ दिएपछि बैठकमा बोल्ने क्रम सकिनेछ ।
बैठकमा प्रस्तुत भएको १० एजेन्डाबारे सोमबार वा मंगलबार निर्णय हुने बताईएको छ । महामन्त्री थापाले प्रस्तुत गरेको वार्षिक कार्ययोजनालाई भने केन्द्रिय समितिले पारित गर्छ वा गर्दैन भन्नेबारे केही खुलाईएको छैन ।
