काठमाडौँ । मंगलबारबाट सुरु भएको नेपाली कांग्रेस केन्द्रीय कार्यसमितिको बैठक मंगलबारका लागि सकिएको छ । बैठक बुधबार ११ बजे पुनः बस्ने छ ।
पार्टी केन्द्रीय कार्यालय सानेपामा बसेको मंगलबारको बैठकमा पार्टीका उपसभापति पूर्णबहादुर खड्का, महामन्त्रीद्वय गगन कुमार थापा र विश्वप्रकाश शर्मा, केन्द्रीय सदस्यहरू आनन्द ढुंगाना, रमेश लेखक, गोपालमान श्रेष्ठ लगायतले आफ्नो लिखित प्रतिवेदनसहित आफ्ना धारणा राखेका छन् ।
महामन्त्री गगनकुमार थापाको सांगठनिक प्रतिवेदनमा उनले पार्टी सदस्यता ७ लाख थप गर्नुपर्ने प्रस्ताव गरेका छन् ।
बुधबार बिहान ११ बजे बैठक बस्ने भएकोले उपस्थित हुन सभापति शेरबहादुर देउवाले सबै केन्द्रीय सदस्यलाई आह्वान गरेका छन् ।
