काठमाडौँ । गायक रोविन तामाङलाई श्रद्धाञ्जली अर्पण गर्न आज बिहान संगीत तथा नाट्य एकेडेमीको प्रांगणमा शव राखिने भएको छ । बिहान ८ बजेदेखि ११ बजेसम्मको लागि नक्सालस्थित एकेडेमीको प्रांगणमा श्रद्धाञ्जली अर्पण गर्ने कार्यक्रम राखिएको हो ।
त्यसपछि अन्तिम संस्कारको लागि बिजेश्वरीस्थित शोभा भगवतीमा लग्ने कार्यक्रम छ । रोविनको गत मंगलबार निधन भएको थियो । उनी बूढानीलकण्ठस्थित निवासमा मृत फेला परेका थिए ।
रविन उम्दा गायकका साथै कलाकार पनि हुन् । उनी पछिल्लो समय फिल्म ‘छड्के-२’ मा देखिएका थिए । छड्केबाहेक उनले मुखौटा, जय परशुराम, चिसो एस्ट्रेलगायत फिल्ममा अभिनय गरेका छन् । उनका ‘चिसो चिसो हावामा’, ‘जति माया लाए पनि’, ‘भुलमा भुलियो’ लगायत गीत चर्चित छन् । रविन रियालिटी शो रोडिजका जज पनि बनेका थिए ।
