काठमाडौँ । रामेछाप नगरपालिकाको १३ औ नगर सभाले आफ्नो पालिका मार्फत आगामी आर्थिक वर्षका लागि कुल ७३ करोड ५८ लाख ६३ हजार, ६ सय ९७ रुपैयाँ विनियोजन गरेको छ ।
उक्त बजेट मध्ये नगरले पूर्वाधार विकासलाई पहिलो प्राथमिकता दिएर २४ करोड २९ लाख ८३ हजार सात सय सन्तानब्बे रुपैयाँ विनियोजन गरेको छ । जस अन्तर्गत सडक, सिँचाइ, भवन लगायतका पूर्वाधार विकासहरू रहेका छन् ।
त्यसै गरी दोस्रो प्राथमिकतामा सामाजिक विकास परेको छ जुन शीर्षकका २ करोड ७५ लाख ३४ हजार विनियोजन गरिएको छ ।
जस अन्तर्गत शिक्षा तर्फ १ करोड ७ लाख विनियोजन गरेको छ भने स्वास्थ्य तर्फ ८७ लाख विनियोजन गरिएको छ त्यसै गरी महिला तथा बालबालिका तर्फ ८१ लख ३४ हजार ४६ हजार विनियोजन गरिएको छ ।
नगरले आर्थिक विकासका लागि कुल १ करोड १० लाख विनियोजन गरेको छ । जस अन्तर्गत कृषि तर्फ ४० लाख, पशु विकास तर्फ ४० लाख विनियोजन गरिएको छ भने राजस्व सहकारी उद्योग तथा उपभोक्ता हित संरक्षण तर्फ र ३० लाख रकम विनियोजन गरिएको छ ।
त्यसै गरी सुशासन तथा संस्था विकास तर्फ ११ लाख ६० हजार विनियोजन गरिएको छ भने वन वातावरण र विपद् व्यवस्थापन तर्फ ४६ लाख बजेट विनियोजन गरिएको छ ।
आइतबार सम्पन्न रामेछाप नगर सभाले उक्त रकम विनियोजन गर्ने प्रस्ताव गरेको हो । एक हप्ता सम्म छलफल गरेर यही असार १८ गते बजेटको टुङ्गो लाग्ने रामेछाप नगरपालिकाका प्रवक्ता समीर कार्कीले कार्यक्रमका अबसरमा बताउनुभयो ।
