काठमाडौँ । नक्कली भुटानी शरणार्थी ठगी प्रकरणमा संलग्न अर्की अभियुक्तलाई प्रहरीले पक्राउ गरेको छ । प्रहरीले शुक्रबार अनुसन्धान अघि बढेदेखि फरार रहेकी अभियुक्त लक्ष्मी महर्जनलाई पक्राउ गरेको हो।
फरार रहेकी अभियुक्त लक्ष्मी महर्जनलाई पक्राउ गरेपछि आजै जिल्ला अदालत काठमाडौँमा उपस्थित गराइएको काठमाडौँ प्रहरी परिसरका एसपी सिताराम रिजालले जानकारी दिएका छन् ।
अन्य अभियुक्तको बयान चलिरहेका बेला पक्राउ परेकी महर्जनलाई सिधै अदालतमा उपस्थित गराइएको उनले बताएका छन् ।
अब महर्जनको पनि अदालतमै बयान अघि बढ्ने भएको छ । उनी सँगै यो प्रकरणमा पक्राउ पर्नेको संख्या १७ पुगेको छ ।
नक्कली भुटानी शरणार्थी प्रकरणमा जिल्ला सरकारी वकिलको कार्यालय काठमाडौँले बुधबार नै अदालतमा मुद्दा दर्ता गरिसकेको छ । भने, पूर्वउपप्रधानमन्त्री टोपबहादुर रायमाझी र पूर्व गृहमन्त्री बालकृष्ण खाँणसहित पक्राउ परेका १६ जना र पक्राउ नपरेका १७ जनासहित ३३ जनाविरुद्ध मुद्दा चलाइएको छ।
अझै पनि १४ जना फरार सूचीमा छन् । उनीहरुविरुद्ध पनि प्रहरीले मुद्दा दर्ता गरिसकेको छ ।
