काठमाडौँ । सरकारले यो वर्षदेखि असोज २ गते शिक्षा दिवस मनाउने निर्णय गरेको छ । मंगलबार बसेको मन्त्रिपरिषद्को बैठकले यस्तो निर्णय गरेको हो ।
यसअघि ८ सेप्टेम्बरमा पर्ने अन्तर्राष्ट्रिय साक्षरता दिवसको अवसरमा शिक्षा दिवस पनि मनाइँदै आएको थियो । तर, २०३१ सालदेखि २०६२÷६३ को राजनीतिक परिवर्तनअघि सम्म १२ फागुनमा शिक्षा दिवस मनाउने गरिएको थियो ।
सबै बालबालिकालाई अनिवार्य र निःशुल्क शिक्षासम्बन्धी ऐन पारित भएको दिन २ असोज भएकोले सोही दिन शिक्षा दिवस मनाउने निर्णय सरकारले गरेको हो ।
त्यस्तै मन्त्रिपरिषद्को बैठकले शिक्षा क्षेत्रमा लगानी गर्ने विद्यालय शिक्षा क्षेत्र आयोजनाका लागि विश्वव्यापी साझेदारीबाट प्राप्त १९.० मिलियन अमेरिकी डलर अनुदान सहायता स्वीकार गर्ने निणइ गरेको छ ।
त्यस्तै, विद्यालय क्षेत्र रुपान्तरणका लागि विश्व बकैंबाट प्राप्त हुने १२० मिलियन डलरको सहुलियतपूर्ण ऋण स्वीकार गर्ने निर्णय गरेको छ ।
