काठमाडौँ । नक्कली भुटानी शरणार्थी प्रकरणमा पक्राउ परेका पूर्वगृहमन्त्री बालकृष्ण खाँणको आजबाट बयान सुरु हुने भएको छ । सरकारी वकिलले आजबाट पूर्वमन्त्री खाँण पक्राउको विषयमा केन्द्रित भएर बयान लिन सुरु गर्ने भएको हो ।

उनीसँग बुधबार सामान्य सोधपुछ गरिएको थियो । ‘प्रहरीले किन पक्राउ गरेको हो ? अदालतले के-के निर्णय दियो ? लगायतको विषयमा सोधपुछ गरिएको छ,’ एक सरकारी वकिलले भने, ‘आजबाट पक्राउ पर्नुको कारण के हो र त्यसमा उनको संलग्नता के कस्तो हो ? भन्ने विषयमा केन्द्रित भएर बयान सुरु हुनेछ ।’

नक्कली भुटानी शरणार्थी प्रकरणमा खाँणको संलग्नता र उनका सहयोगीहरूका बारेमा पनि सोधपुछ गरिने भएको हो । बुधवार बिहान ‘जरुरी पत्र’मार्फत पक्राउ परेका पूर्वगृहमन्त्री खाँणमाथि अनुसन्धान गर्नका लागि जिल्ला अदालत, काठमाडौँले चार दिनको समय दिइसकेको छ ।

अदालतले दिएको समयसीमाभित्र नै खाँणको बयान सक्ने तयारीमा सरकारी वकिलको कार्यालय रहेको छ । रातभर प्रहरी कस्टडीमा बिताएका खाँणसँग बिहान १० बजेपछि सरकारी वकिलले बयान लिन सुरु गर्ने जनाइएको छ ।