काठमाडौँ । राजधानीको कपनमा भएको घटनाको अनुसन्धान गर्न प्रहरीले ११ सदस्यीय अनुसन्धान समिति गठन गरेको छ । प्रहरीले केन्द्रीय अनुसन्धान ब्युरोकी एआईजी किरण बज्राचार्यको नेतृत्वमा ११ सदस्यीय अनुसन्धान समिति गठन गरेको प्रहरी प्रधान कार्यालयले जनाएको छ । समितिमा जिल्ला प्रहरी परिसर काठमाडौँका एसएसपी दानबहादुर कार्की, उपत्यका अपराध अनुसन्धान कार्यालयका एसएसपी डा. मनोज केसी, ब्युरोकै एसएसपी दिनेश आचार्य, डीएसपी धर्मराज भण्डारी, प्रहरी वृत्त बौद्धका डीएसपी हरि बस्नेतलगायत छन् ।
कपनमा भाँडा पसल सञ्चालन गर्ने निरा पाण्डे आचार्यको हत्या रहस्य बन्दै गएपछि प्रहरीले गम्भीरता देखाउँदै उच्चस्तरीय अनुसन्धान समिति बनाएको हो । वैशाख ७ मा दिउँसो कपनस्थित सरस्वती नगरमा भाँडा पसलको काउन्टरमा उनी मृत भेटिएकी थिइन् । घटना भएको ९ दिनसम्म पनि प्रहरीले आरोपीको पहिचान गर्न सकेको छैन । यो घटनालाई लिएर नेकपा एमालेसहितका दलहरुले समेत गम्भीर चासो राख्दै सत्यतथ्य पत्ता लगाउन प्रहरी र सरकारमाथि दवाव बढाउँदै आएको छ ।
घटनाको अनुसन्धानमा यसअघि नै पनि केन्द्रीय अनुसन्धान ब्युरोले आफ्नो टिम परिचालन गरिसकेको छ । ३५ वर्षीया निराको शरीरको २० ठाउँमा चक्कुको डोब देखिएको छ । बाहिरबाट पसलमा प्रवेश गरेर दोस्रो व्यक्तिले उनको हत्या गरेको प्रहरीको निष्कर्ष छ । निराले सञ्चालन गरेको पसलभन्दा ३ सय मिटर पर उनका पति योगेन्द्र आचार्यले इलेक्ट्रिक सामग्री पसल चलाउँछन् ।
