काठमाडौँ । नेपाली क्रिकेटर सन्दीप लामिछानेविरुद्धको बलात्कारको आरोप मुद्दामाथि आज सुनुवाइ हुँदैछ । जिल्ला अदालत काठमाडौँले आज बलात्कार आरोप लागेका सन्दिप लामिछाने विरुद्धको मुद्दाको पेसी तोकेको छ ।
मुद्दा तेस्रो प्राथमिकतामा राखिएकाले आजै सुनुवाइ हुने सम्भावना बढी रहेको छ । अघिल्लो साता पालो नपाएकाले मुद्दाको सुनुवाइ हुन सकेको थिएन ।
सन्दीप लामिछाने विरुद्ध गौशाला २६ नाम परिबर्तन गरिएकी एक किशोरीले गएको भदौ २१ मा आफुलाई जबरजस्ती करणी गरेको आरोप लगाएकी थिइन् । त्यसको एक महिनापछि २०७९ असोज २० गते सन्दीप लामिछाने पक्राउ परेका थिए । सुरुमा जिल्ला अदालतले उनलाई पुर्पक्षका लागि थुनामा पठाउने आदेश दिएको थियो । तर तीन महिनाबढी थुनामा बसेपछि उच्च अदालत पाटनले जिल्ला अदालत काठमाडौँको आदेशलाई बदर गर्दै २० लाख रुपैयाँ धरौटीमा छाड्न आदेश दिएको थियो । त्यसपछि यो मुद्दा सर्वोच्च पुगेको थियो ।
दुवै पक्ष सर्वोच्चमा पुगेपनि सर्वोच्चले उच्च अदालत पाटनको आदेश संशोधन गर्दै सन्दीप लामिछाने माथि विदेश जान लागेको प्रतिबन्ध समेत हटाउन आदेश दिएको थियो । अब भने अन्तिम सुनुवाइ सुरु हुने भएको हो । अन्तिम सुनुवाइका क्रममा सन्दीपले सफाइ पाउने कि दोषी ठहर भएर जेल जाने भन्ने टुंगो लाग्नेछ ।
