काठमाडौं । अर्थशास्त्री स्वर्णिम वाग्लेले महामन्त्री गगनकुमार थापा र विश्वप्रकाश शर्मासहित ४ नेतालाई आफू अब नेपाली कांग्रेसमा नरहेको सन्देश पठाएका छन् ।
वाग्लेलाई राष्ट्रिय स्वतन्त्र पार्टीले तनहुँ–१ बाट उपनिर्वाचनमा उम्मेदवार बन्न प्रस्ताव गरेको छ । यही सन्दर्भमा वाग्लेले महामन्त्रीद्वयसँगै नेताहरु डा. शेखर कोइराला र डा. गोविन्द राज पोखरेललाई एसएमएस पठाएर आफू नेपाली कांग्रेसमा नरहेको बताएका छन् ।
शेरबहादुर–आरजु कांग्रेसमा रहिन’ भन्दै उनले भविष्यमा यी ४ नेता नेतृत्वमा पुगेमा पुनः सहकार्य हुने सन्देश पठाएको एक नेताले जानकारी दिएका छन् ।
स्वर्णिमको एसएमएस आएपछि महामन्त्रीद्वय र अरु नेताहरुले निरन्तर सम्पर्कको प्रयास गरेका छन् । तर स्वर्णिमसँग सम्पर्क हुन सकेको छैन ।
स्रोतका अनुसार स्वर्णिम रास्वपाबाट उपचुनावमा उम्मेदवार बन्ने मनस्थितिमा पुगिसकेका छन् । राष्ट्रिय स्वतन्त्र पार्टीले ४ मंसिरको चुनावमै स्वर्णिमलाई काठमाडौंको कुनै निर्वाचन क्षेत्रबाट चुनाव लड्न प्रस्ताव गरेको थियो ।
तर त्यतिबेला नेपाली कांग्रेसको घोषणापत्र मस्यौदा समितिमा रहेका स्वर्णिमले अस्वीकार गरेका थिए । स्वर्णिम नेपाली कांग्रेसबाटै उम्मेदवारको आकांक्षी भए पनि उनले टिकट पाएका थिएनन् ।
वाग्लेले नेपाली कांग्रेसका नेता डा. शेखर कोइरालालाई पत्र लेख्दै आफू अब नेपाली कांग्रेसमा बस्न नसक्ने जनाएका हुन् । उनले डा. कोइरालालगायत नेताको अपार सद्भाव आफूप्रति रहे पनि सभापति शेरबहादुर देउवा र आरजु राणा गिरोहको निरन्तर हेपाई र अपमानका कारण आफू नेपाली कांग्रेसमा रहन सक्ने अवश्था नरहेको बताएका छन् ।
उनले आफ्नो उमेर छँदै ‘डेलिभरी’ दिनुपर्छ भन्ने लागेर नेपाली कांग्रेसमा रहन नसक्ने निर्णयमा पुगेको समेत पत्रमा उल्लेख गरेका छन् । नेपाली कांग्रेसमा डा. शेखर समूहको शक्ति निर्णायक बनेपछि आफू कुनै न कुनै रुपमा नेपाली कांग्रेसमा जोडिने प्रतिबद्धता पनि उनले गरेका छन् ।
यस्ताे छ वाग्लेले काेइरालालाई लेखेकाे पत्र
प्रिय शेखर दाई,
हजुरहरुको अपार सद्भावका बावजूद म कांग्रेसमा रहन नसक्ने अवस्था आएको छ। देउवा–आरजु गिरोहको निरन्तर हेपाई र अपमानले यो स्थिति ल्याएको हो । अब कुरेर बस्ने कृपा र निगाहको जीवनपर्यन्त राजनीतिभन्दा समयसीमा तोकेर आफ्नो उमेर, ज्ञान र ऊर्जा सान्दर्भिक रहँदै ‘डेलिभरी’को प्रयोगमा जान चाहेँ । यो निर्णय लिनुअघि हजुरहरुसँग भेटेको भए निश्चय पनि कांग्रेस नछोड्न भन्नुहुने र त्यसपछि छोड्दा अवज्ञा गरेको हुने भएकोले श्रद्धापूर्वक पछि नै हामी बस्नेछौँ । काँग्रेस पार्टीमा हजुरहरुको निर्णायक हैसियत बनेको दिन फेरि हामी कुनै न कुनै रुपमा जोडिन सक्ने आशा छ। त्यतिन्जेल जहाँजहाँ रहन्छौँ, त्यहींबाट सहकार्य र सहयोग गर्ने र अहिलेको आत्मीय मित्रता कायम राख्ने वाचा गर्दछु ।
स्वर्णिम
