काठमाडौं । बागमती प्रदेशका मुख्यमन्त्री शालिकराम जम्कट्टेलले आज विश्वासको मत लिने तयारी गरेका छन् । उनले विश्वासको मत लिनका लागि आज दिउँसो ३ बजे प्रदेश सभा बैठक बोलाइएको छ ।
नेकपा माओवादी केन्द्रका नेता एवम् बागमती प्रदेशका भौतिक पूर्वाधार मन्त्री युवराज दुलाल (शरद)ले आज मुख्यमन्त्री जम्मकट्टेलले विश्वासको मत लिने तयारी गरेको जानकारी दिएका हुन् ।
प्रदेश सचिव कृष्णहरि खड्काले आजको प्रदेश सभा बैठकमा विश्वासको मत लिने बाहेक अन्य कार्यसूची नभएको बताएका छन् ।
नेकपा माओवादी केन्द्रका नेता जम्कट्टेल गत पुष २५ गते नेपाली कांग्रेस,नेकपा एमाले,राष्ट्रिय प्रजातन्त्र पार्टी राप्रपासहित ६ दलका १०५ सांसदको समर्थन पाएर मुख्यमन्त्री नियुक्त भएका थिए । उनले माघ ३ गते विश्वासको मतसमेत लिएका थिए । त्यतिबेला दिएको समर्थन राष्ट्रिय प्रजातन्त्र पार्टी राप्रपाले फिर्ता लिएपछि मुख्यमन्त्री जम्मकट्टेलले पुनः विश्वासको मत लिन लागेका हुन् ।
केन्द्र सरकारमा बदलिएको सत्ता समीकरणसँगै राष्ट्रिय प्रजातन्त्र पार्टी राप्रपाले सरकारलाई दिएको समर्थन फिर्ता लिएको थियो । केन्द्र सरकारको समर्थन फिर्ता लिंदै सरकार छाडेको नेकपा एमालेले बागमती प्रदेश सरकार भने छाडेको छैन । सरकारबाट बाहिरिने कि नबाहिरीने भनी निर्णय गर्न आज संसदीय दलको बैठक बोलाइएको नेकपा एमाले नेता जगन्नाथ थपलियाले बताएका छन् ।
बागमती प्रदेश सभामा ११० जना सांसद छन् । विश्वासको मतका लागि ५६ जना सांसदले साथ दिनुपर्छ । बागमती प्रदेश सभामा नेपाली कांग्रेसका ३७, नेकपा माओवादी केन्द्रका २१ र नेकपा एकीकृत समाजवादीका ७ जना सांसद छन् । यसैगरी नेकपा एमालेका २७, राप्रपाका १३, नेपाल मजदुर किसान पार्टीका ३ र हाम्रो नेपाली पार्टीका २ जना सांसद छन् ।
