काठमाडौं । राष्ट्रपति निर्वाचनको उम्मेदवारी लगत्तै नेकपा एमाले आफ्ना उम्मेदवारलाई जिताउने अभियानमा जुटेको छ ।
नेकपा एमालेले शनिबार नै प्रतिष्पर्धी नेपाली कांग्रेस बाहेक संसदमा प्रतिनिधित्व गर्ने सबै दलहरुलाई आफ्ना उम्मेदवार सुवास नेम्वाङलाई सघाउन आग्रह गर्दै पत्राचार गरेको छ ।
नेकपा एमाले केन्द्रीय कार्यालयका सचिव डा. भीष्म अधिकारीका अनुसार कांग्रेस बाहेक संसदमा रहेका सबै दल तथा स्वतन्त्र सांसदहरुलाई पत्र पठाइएको हो ।
राजनीतिक दलहरु र स्वतन्त्र सांसद गरी १७ वटा पत्र पठाएको अधिकारीले जानकारी दिनुभएको छ ।
संविधानको मर्म र भावनाअनुरुप नेम्वाङ राष्ट्रपतिका लागि अत्यन्त योग्य र उपयुक्त उम्मेदवार रहेको जिकीर नेकपा एमाले अध्यक्ष केपी शर्मा ओलीले पठाएको पत्रमा उल्लेख छ ।
नेकपा एमालेको पत्रको सम्बन्धमा नेकपा (एकीकृत समाजवादी) ले भने संवादको ढोका खुलेको जनाएको छ । सो पार्टीका प्रवक्ता जगन्नाथ खतिवडाले नेकपा एमालेको पत्रले भविष्यमा सहकार्यको ढोका खोलेको तर राष्ट्रपति निर्वाचनमा भने नेम्वाङलाई आफूहरुले भोट हाल्ने अवस्था नरहेको बताउनु भएको छ ।
