काठमाडौं । निर्वाचनअघिको गठबन्धन ब्युताएर राष्ट्रपति निर्वाचनमा जाने विषयमा नेपाली कांग्रेस, नेकपा माओवादी केन्द्र र नेकपा एकिकृत समाजवादी बीच भद्र सहमति भएको छ ।
प्रधानमन्त्री निवास बालुवाटारमा बुधबार भएको छलफलमा बिहीबार साँझसम्म ठोस सहमति गरेर राष्ट्रपति निर्वाचनमा उम्मेदवार तय गर्ने निर्णय भएको हो ।
सरकार गठनको लागि नेकपा एमाले राष्ट्रिय स्वतन्त्र पार्टी र राष्ट्रिय प्रजातन्त्र पार्टीको निर्णायक साथ लिएका प्रधानमन्त्री पुष्पकमल दाहाल प्रचण्ड”ले राष्ट्रपति निर्वाचनमा भने यी तीन दललाई बाहिर राख्ने रणनीति लिनुभएको छ ।
राष्ट्रपतिमा नेपाली कांग्रेसले अघि सार्ने उम्मेदवारलाई सहयोग गर्ने वचन उहाँले नेपाली कांग्रेसका सभापति शेर बहादुर देउवालाई दिएपछि दलहरु निर्वाचनअघिको पुरानो गठबन्धन ब्युताउन सहमत भएका हुन् ।
लिखित सहमतिको आधारमा सरकारमा समेत भागबण्डा गर्ने उनीहरुको तयारी छ । नेपाली कांग्रेस र नेकपा माओवादी केन्द्र बीच बुधबारको छलफलपछि माधवकुमार नेपाल, उपेन्द्र यादव, महन्थ ठाकुर, सिके राउत र रेशम चौधरीको पार्टीलाई पनि एक ठाउँमा ल्याएर नयाँ गठबन्धन बनाउने सहमति जुटेको बैठकमा सहभागि एक नेताले जानकारी दिएका छन् ।
