काठमाडौँ । प्रमुख प्रतिपक्षी दल नेपाली कांग्रेसले बालाजुस्थित बसपार्क क्षेत्रमा दुई दिनअघि मजदुर आन्दोलनका नाममा भएको लुटपाटलाई लिएर संसदमा प्रश्न उठेको छ। मंगलबार बसेको प्रतिनिधिसभाको बैठकमा नेपाली कांग्रेसका सांसद डा. प्रकाशशरण महतले व्यवसायीका कयौँ पसल र दोकान लुटिँदा समेत सरकार रमिते बनेको बताएका छन् ।
काठमाडौँको मुटुमै मजदुर या अन्य समूहको नाममा लुट मच्चिएको छ। राजधानीमै सरकारले सुरक्षा दिन सक्दैन भने गाउँका मानिसको हालत के होला ? नेपाली कांग्रेस प्रवक्ता समेत रहेका महतको प्रश्न छ । यातायात मजदुरको नाममा दिनदहाडै लुटपाट भएको भन्दै यथार्थ छानबिन गरेर न्यायिक निरुपण गरिनुपर्ने महतले बताएका छन् ।
मजदुर प्रवेश गरेका हुन् कि कुनै शक्तिको आडमा संलग्न भएका छन् कि ?’ उनले भने, ‘त्यसको यथार्थ छानबिन गरेर न्यायिक निरूपण गरिनुपर्छ। सरकारले यी घटनामा संलग्नलाई परिणाम आउने गरी कारबाही गरोस्। डा. महतले बसपार्क क्षेत्रको ल्होत्से मलसहितमा भएको लुटपाटमा संलग्नलाई कारबाही नभएमा देशभर नकारात्मक सन्देश जाने पनि बताएका छन् ।
‘यसले देशभर नकारात्मक सन्देश जान्छ । कारबाही नभए देशभर अराजकता फैलिन्छ,’ उनले भने । यसरी अराजकता फैल्याउने र लुट मच्चाउनेमाथि सरकारले कारबाही गर्नुपर्नेमा उनको जोड रहेको थियो ।
