काठमाडौं । प्रतिनिधि सभाको उपसभामुख चयनका लागि शुक्रबारदेखि निर्वाचन प्रक्रिया सुरु हुँदैछ । संघीय संसद सचिवालयका अनुसार शुक्रबार उपसभामुखका लागि उम्मेदवारी (मनोनयन) दर्ताको कार्यतालिका रहेको छ ।
मनोनयन दर्ताको समय दिउँसो १ बजेदेखि ४ बजेसम्मका लागि तोकिएको छ । उम्मेदवारको नामावली शुक्रबार नै प्रकाशन गरिनेछ । शनिबार बस्ने प्रतिनिधि सभा बैठकमा उपसभामुख चयनको लागि मतदान हुनेछ ।
उपसभामुखमा शुक्रबार मनोनयन दर्ता गर्ने दिन भए पनि दलहरूले उम्मेदवारको टुंगो लगाइसकेका छैनन् । सत्ता गठबन्धनमा उपसभामुख राष्ट्रिय स्वतन्त्र पार्टीको भागमा परेको छ । गठबन्धनले काठमाडौं २ बाट निर्वाचित सांसद सोविता गौतमलाई उम्मेदवार बनाउने तयारी गरेको छ भने कांग्रेसले पनि उम्मेदवारी दिने तयारी गरेको छ ।
प्रतिनिधि सभाले बिहीबार सभामुख पाएपछि आजदेखि उपसमाभुखको निर्वाचन प्रक्रिया सुरु गरिएको हो ।
प्रतिनिधि सभामा बिहीबार भएको निर्वाचनमा एमाले सांसद देवराज घिमिरेले प्रतिस्पर्धी नेपाली कांग्रेसकी ईश्वरीदेवी न्यौपानेलाई पराजित गर्दै सभामुख चुनिनु भएको हो ।
