काठमाडौँ । सत्ता साझेदार दलहरूले तीनवटा मन्त्रालय फुटाउने तयारी गरेका छन् । भागबन्डा मिलाउन मन्त्रालय फुटाएर २५ वटा पुर्याउने तयारी भएको हो ।
अहिले मन्त्रालयको संख्या प्रधानमन्त्री तथा मन्त्रिपरिषद्को कार्यालयसहित २२ छन । स्रोतकाअनुसार युवा तथा खेलकुद, शिक्षा, विज्ञान तथा प्रविधि र भौतिक पूर्वाधार तथा यातायात मन्त्रालय टुक्य्राउने विषयमा छलफल भएको हो । यसअघि २०७४ को आम निर्वाचनपछि कार्यविभाजन नियमावली संशोधन गरेर मन्त्रालयको संख्या १८ मा सीमित गरिएकामा तत्कालीन प्रधानमन्त्री केपी शर्मा ओलीले सरकार गठनको एक महिनामै मन्त्रालय २२ वटा पुर्याएका थिए ।
अहिले माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्वमा सरकार बनेपछि मन्त्रालय फुटाउने कसरत सुरु भएको हो । सरकारलाई समर्थन गरेका सबै दलले मन्त्रालय पाउनुपर्ने दाबी गरिरहेकाले उनले मन्त्रालय विभाजन गर्न मुख्यसचिव शंकरदास बैरागीलाई निर्देशन दिएको बुझिएको छ । संविधानअनुसार मन्त्रिपरिषद्को संख्या २५ भन्दा बढी विस्तार गर्न मिल्दैन ।
तर उपप्रधानमन्त्रीको संख्याबारे भने संविधानमा केही उल्लेख गरेको छैन । त्यसैले उपप्रधानमन्त्रीको संख्या पनि पाँच पुर्याउन कसरत सुरु भएको हो । हाल सरकारमा तीन उपप्रधानमन्त्री छन् । राप्रपा र जनता समाजवादी पार्टी जसपाले कम्तीमा एउटा उपप्रधानमन्त्री चाहिने सर्त राखेका छन् । ती दललाई उपप्रधानमन्त्री दिँदा उपप्रधानमन्त्रीको संख्या पाँचवटा पुर्याउनुपर्ने बाध्यता”प्रचण्ड” नेतृत्व सरकारलाई छ ।
पुस २५ गते प्रतिनिधिसभाबाट विश्वासको मत लिएपछि मात्र दुई दललाई उपप्रधानमन्त्रीसहित सरकारमा सहभागी गराउने उनको तयारी रहेको छ । २०७४ को चुनावअघि संघमा मन्त्रालयको संख्या ३१ वटा थियो । तत्कालीन प्रधानमन्त्री शेरबहादुर देउवाले भागबन्डा मिलाउन पटक–पटक विस्तार गर्दै मन्त्रिपरिषद्लाई ६४ सदस्यीय बनाएका थिए, जुन अहिलेसम्मकै ठूलो मन्त्रिपरिषद् हो ।
