काठमाडौं । बागमती र गण्डकी प्रदेशका नवनिर्वाचित प्रदेशसभा सदस्यले बिहीबार शपथ लिँदैछन् ।
संवैधानिक व्यवस्थाअनुसार प्रदेश प्रमुखले प्रदेशसभा सदस्यका ज्येष्ठ सदस्यलाई र ज्येष्ठ सदस्यले अन्य सदस्यलाई शपथ ग्रहण गराउने प्रावधान छ । जस अनुसार बागमतीमा ज्येष्ठ सदस्य रामप्रसाद ढुङ्गानाले र गण्डकीमा ज्येष्ठ सदस्य मित्रलाल बस्यालले बिहीबार अरु सदस्यलाई शपथ गराउनेछन् ।
बागमती प्रदेशसभाका १ सय १० सदस्यमध्ये ज्येष्ठ सदस्य ढुङ्गानाले बुधबार नै प्रदेश प्रमुख यादवचन्द्र शर्मासमक्ष शपथ ग्रहण गरिसक्नु भएको छ र बाँकी १ सय ९ प्रदेशसभा सदस्यलाई ढुङ्गानाले बिहीबार शपथ गराउनु हुनेछ ।
शपथ ग्रहणको कार्यक्रम दिउँसो २ बजे प्रदेशसभा सचिवालय हेटौंडामा राखिएको छ ।
यस्तै, बुधबार नै गण्डकी प्रदेशसभाका प्रदेश प्रमुख पृथ्वीमान गुरुङबाट शपथ लिनु भएका ज्येष्ठ सदस्य मित्रलाल बस्यालले अरु सदस्यलाई बिहीबार शपथ गराउनु हुनेछ ।
दिउँसो १ बजे प्रदेश सभा सचिवालयमा शपथको कार्यक्रम तय भएको प्रदेश प्रमुखको कार्यालयले जनाएको छ । ६० प्रदेशसभा सदस्य रहेको गण्डकी प्रदेशमा बिहीबार ५९ जना सदस्यले शपथ लिने छन् ।
