काठमाडौं । लण्डन बेलायतमा दशैँ तिहारको लागि तय भएका मनोरन्जनात्मक कार्यक्रमहरु गर्नका लागि चर्चित लोक दोहोरी गायक प्रकाश कटुवाल र हास्य कलाकारहरु बेलायतमा उत्रिएका छन् ।
प्रवासमा पनि नेपाली कला संस्कृतिको प्रबद्र्धनसहित मनोरञ्जनात्मक कार्यक्रम गर्न गायक तथा हास्य कलाकारहरु लण्डन आइपुगेका हुन् । उनीहरुलाई जेन्स युकेका अध्यक्ष तिलक भट्टराई र जेन्स युकेका सल्लाहकार डा. मुकुन्द बास्तालाले शनिवार साँझ बेलायतमा स्वागत गरेका थिए ।
कलाकारहरुले बेलायतका विभिन्न शहरमा दशैँ तिहार कार्यक्रम गर्दैछन ।कार्यक्रमका लागि लोक गायक प्रकाश कटुवाल, हास्यकलाकारहरु मरिचमान श्रेष्ठ (उर्फ बल्छी धुर्वे ) र राजु पौडेल (उर्फ राजु मास्टर) शनिवार यहाँ आइसकेका छन् ।
गायक कटुवाल पहिलो पटक बेलायतमा हुने कार्यक्रममा सहभागी हुदैछन् । उनको “चोरी खान पल्केको यो ढाडे बिरालो” लगायतका दर्जनौ भन्दा पनि धेरै गीतहरु निकै चर्चामा रहेका छन।
मेरी बास्सै हास्य टेलिश्रृङ्खलाबाट चर्चित तथा टेलिश्रङ्खला जुठे ‘र “हल्का रमाइलो’ नामक सिरियलले चर्चित कलाकार बल्छी धुर्वे र राजु मास्टरले दिने कार्यक्रमबाट बेलायतवासी नेपालीहरुले मनोरन्जन लिने अपेक्षा गरेको सफल व्यवसायी तिलक भट्टराईले बताएका छन ।
