काठमाडाैं । प्रधानमन्त्री तथा मन्त्रिपरिषदकाे कार्यालयका राज्यमन्त्री उमेश श्रेष्ठले स्थानीय सरकारलाई संविधानले तोकिएको अधिकार दिएमात्र देशको प्रगति हुने बताउनुभएको छ ।
राष्ट्रिय सभा अन्तर्गतको संघीयता कार्यान्वयन अध्ययन तथा अनुसन्धान संसदीय विशेष समितिले सोमबार हेटौंडामा आयोजनामा गरेको ‘संघीय शासन प्रणाली सबलीकरण विषयक अन्तरक्रिया कार्यक्रममा बोल्दै उहाँले यस्ताे बताउनुभएकाे हाे । स्थानीय सरकारलाई जति अधिकार दियो त्यति देशको प्रगति हुने उहाँले बताउनुभएको हो ।
उहाँले स्थानीय, प्रदेश र संघबीच अधिकारको सम्बन्धमा विवाद हुने गरेको भन्दै स्थानीय सरकारलाई संविधानले तोकेको अधिकार दिनुपर्ने बताउनुभयो । उहाँले स्थानीय सरकारलाई बलियो बनाउनुपर्नेमा जोड दिनुभयो । राज्यमन्त्री श्रेष्ठले स्थानीय सरकारले जनतालाई प्रत्यक्ष अनुभुति हुनेगरी गर्न प्राथमिकता दिइनुपर्ने बताउनुभयो ।
राज्यमन्त्री श्रेष्ठले विकास निर्माणको काममा प्रदेश–प्रदेशका विचमा प्रतिष्पर्धा हुनुपर्ने बताउनुभयो । उहाँले प्रदेश र स्थानीय सरकारले रोजगारमुलक र व्यवसायमुलक शिक्षामा ध्यान दिनुपर्ने बताउनुभयो । उहाँले उत्पादनमुलक उद्योगहरुको स्थापना गर्न जोड दिनुपर्ने बताउनुभयो । उहाँले प्रदेश सरकारले ऐन, नियम तथा कानूनहरु बनाउँदा नयाँ औद्योगिक क्षेत्रहरुको स्थापना गर्नेतर्फ पनि ध्यान दिनुपर्ने बताउनुभयो ।
उहाँले संघीयता प्रयोगकै चरणमा रहेको भन्दै धेरै कानूनहरुलाई परिवर्तन गर्नु आवश्यक रहेको बताउनुभयो । चुनावको घोषणा भइसकेकाले आगामी संसदले बाँकी रहेका कानूनहरु निर्माण गर्ने उहाँले बताउनुभयो ।
