काठमाडौँ । सामाजिक सञ्जालमा सक्रिय धरान उपमहानगरपालिकाका मेयर हर्क साम्पाङले राजनीतिको परिभाषा दिएका छन् । बिहान फेसबुक लाइभमार्फत उनले राजनीतिबारे आफ्नो बुझाइ राखेका हुन् ।

राजनीति भनेको सबैले समर्थन गर्ने क्षेत्र नभएको उनको भनाई छ । ‘राजनीतिमा विरोधी हुन्छन्, ती विरोधीसँग सङ्घर्ष गर्दै अगाडि बढ्नुलाई नै राजनीति भनिन्छ,’ उनले अगाडि भने, ‘त्यसकारण यो सत्य बुझिदिन आग्रह गर्छु । बाधाहरूलाई चिर्दै अघि बढ्ने क्षेत्र भएकोले विरोधी हुनु जरुरी छ, हुन्छन् नै । यसमा सबै जनाले ताली बजाउनुपर्छ भन्ने छैन ।’

आफूहरूले ठूलो श्रमदान अभियान शुरु गरेको मेयर साम्पाङले बताए । धरानको पर्यायवाची शब्द नै श्रमदान भएको हो, एउटा पुण्यको काम हामीले गरिएका छौँ,’ उनले भने, ‘श्रमको संस्कृति शुरु गर्न सकेकोमा म खुसी छु, केही थान विरोधीहरूले गरेको आलोचनालाई स्विकार्छु ।’

२/४ थान चोर र लुटेर खाऊँ भन्ने लुटेरा प्रवृत्ति भएकालाई छटपटी भएको मेयर साम्पाङले बताए । ‘सबै मिलेर काम गरौँ, सबै मिलेर गर्छौँ भने के गर्न सकिँदैन ।’ उनले भने ।