काठमाडाैँ । नेपाल प्रहरीको फरेन्सिक ल्याबले बजेट तर्जुमामा अनधिकृत व्यक्ति प्रवेशबारे छानबिन गरिरहेको संसदीय समितिलाई अर्थ मन्त्रालयको सीसीटीभी फुटेजसम्बन्धी प्रतिवेदन बुझाएको छ । प्रतिवेदन सोमबार समितिलाई बुझाइएको हाे ।
अर्थ मन्त्रालयले बजेट तर्जुमाको दिनको फुटेज डिलिट भइसकेको भन्दै समितिलाई रेकर्डिङ सिष्टम नै बुझाएको थियो । उक्त डिभाइस रिकभरका लागि समितिले साउन ४ गते ल्याबमा पठाएको थियो । समिति सचिव सुरेन्द्र अर्यालले उक्त प्रतिवेदन प्राप्त भएको बताए । सिलबन्दी रूपमा प्राप्त प्रतिवेदन समिति बैठकमा खोलिनेछ ।
राजनीतिक नेतृत्व र कर्मचारीको बयानमा कुनै ठोस तथ्य फेला नपारेको समितिले फुटेजको निष्कर्षमा आधारित भएर थप अनुसन्धान बढाउने तयारीमा छ । समितिले पहिलो बैठकबाटै मन्त्रालयसँग जेठ १४ गते बजेट तर्जुमा कक्षको फुटेज मागेको थियो। दुई पटकसम्मको ताकेतामा अर्थले समितिलाई अन्य महिनाको फुटेजमात्र दिएको थियो ।
पुनः ताकेतापछि सीसीटीभी सम्बद्ध सबै सिष्टम नै समितिलाई उपलब्ध गराएको हो । डिभाइस प्राप्त भएपछि समितिले विषयविज्ञसँग परामर्श गरेर निर्णय गरेको हो । आइतबार समितिले सिंहदरबारका दुई मूल प्रवेशद्वारको फुटेजसमेत माग गरेको थियो ।
