काठमाडौं । नेकपा(माओवादी केन्द्र)की सांसद विना पोखरेलले दलित समुदायमाथि हुने अमानवीय व्यवहारहरूको अन्त्य हुन नसकेको बताउनुभएको छ ।
मंगलबार राष्ट्रियसभा बैठकको विशेष समयमा बोल्दै सांसद पोखरेलले देशमा ठूलो राजनीतिक परिवर्तन भए पनि दलित समुदायमाथि हुने अपमान र अमानवीय व्यवहारहरूको अन्त्य हुन नसकेको बताउनुभएको हो ।
अझै पनि दलित समुदायलाई अपमान गर्ने संस्कार समाजमा रहेको भन्दै त्यस्तो संस्कारगत चेतनालाई बदल्न राज्यले प्रभावकारी अभियान चलाउनुपर्ने उहाँले बताउनुभयो । निर्वाचन प्रणाली पूर्ण समानुपातिक बनाउनुपर्ने र दलितको प्रतिस्पर्धा दलितसँग मात्रै हुने व्यवस्था मिलाउनुपर्ने उहाँको भनाइ छ ।
सांसद पोखरेलले दलित समुदायभित्रै भएका विभेदहरूको पनि अन्त्य हुनुपर्नेमा जोड दिनुभयो । उहाँले विद्यालयका पाठ्यक्रमहरूले पनि रुढिवादी र अन्धविश्वास कुराहरू सिकाइरहेको भन्दै पाठ्यक्रमहरू दलित समुदायमैत्री हुनुपर्नेमा जोड दिनुभयो ।
