काठमाडौं । नेकपा (एकीकृत समाजवादी)को सचिवालय बैठकले पार्टीको तर्फबाट प्रतिनिधिसभाको प्रमुख सचेतकमा सरला यादवलाई मनोनयन गरेको छ ।
शुक्रबार पार्टी कार्यालयमा बसेको सचिवालय बैठकले यस्तो निर्णय गरेको पार्टीका प्रवक्ता जगन्नाथ खतिवडाले बताउनुभयो ।
बैठकले सुदूरपश्चिम प्रदेश कमिटीको अध्यक्षमा पूर्व सांसद एवं पार्टी केन्द्रीय सदस्य हर्कबहादुर सिंहलाई जिम्मेवारी दिने निर्णय गरेको छ ।
प्रवक्ता खतिवडाले बैठकमा पार्टीका आन्तरिक जीवनमा व्यवस्थापन गर्नुपर्ने विषयमा समेत छलफल भएको बताउनुभयो ।
बैठकपछि संक्षिप्त कुराकानी गर्दै पूर्वप्रधानमन्त्री एवं नेकपा (एकीकृत समाजवादी)का सम्मानित नेता झलनाथ खनालले बैठकमा हालै सम्पन्न केन्द्रीय परिषद्का बैठकले निर्णय गरे बमोजिम पार्टीलाई देशका १६५ वटा संघीय निर्वाचन क्षेत्र र ३३० वटा प्रादेशिक निर्वाचन क्षेत्रमा पार्टी संगठन विस्तार गर्ने, जनवर्गीय संगठनहरू विस्तार गर्ने र पार्टी संगठनलाई राष्ट्रव्यापी रूपमा विस्तार गर्ने निर्णय गरेको बताउनुभयो ।
सम्मानित नेता खनालले मुलुक संघ र प्रदेशको निर्वाचनमय हुन लागेको भन्दै आगामी निर्वाचनका बारेमा तयारी गर्ने कुरालाई पार्टीव्यापी रूपमा अघि बढाउने निर्णय भएको बताउनुभयो ।
