काठमाडौं । नेकपा (एमाले)का सांसद झपटबहादुर रावलले नेपाल प्रहरीलाई नै अध्यागमनको अधिकार दिनुपर्ने बताउनुभएको छ ।
सोमबार राज्य व्यवस्था तथा सुशासन समितिको बैठकमा बोल्दै उहाँले अध्यगमनको कुरा राज्यको राष्ट्रिय सुरक्षासँग जोडिएको विषय भएकोले यसको जिम्मेवारी नेपाल प्रहरीलाई नै दिनुपर्ने बताउनुभयो ।
सांसद रावलले अध्यगमनको बारेमा हतारमा निर्णय लिनुभन्दा यसलाई गम्भीरताका साथ छलफल गरेर मात्रै विधेयक र नीति निर्माण गर्नुपर्ने आवश्यकता रहेको बताउनुभयो । उहाँले अध्यागमनको जिम्मेवारी निजामति कर्मचारीलाई दिने कुरामा सहमत हुन नसक्ने बताउनुभयो ।
‘अध्यागमनको जिम्मेवारी निजामति कर्मचारीलाई भन्दा पनि नेपाल प्रहरीलाई दिनुपर्छ, यो राज्यको राष्ट्रिय सुरक्षासँग जोडिएको विषय हो,’ उहाँले भन्नुभयो, ‘त्यसैले यसलाई हामीले गम्भीरताका साथ लिनुपर्छ, अध्यागमन भनेको आफैंमा सुरक्षा हो ।’
सांसद रावलले अध्यागमनलाई नेपाल प्रहरी वा अन्य सुरक्षा निकाय अन्तर्गत राख्ने गरेर जानुपर्ने बताउनुभयो ।
