काठमाडौं । राष्ट्रिय खेलकुद परिषद् सदस्य सचिव टंकलाल घिसिङले खेलकुद क्षेत्रको विकासका लागि आफूले योजनाबद्ध रुपमा काम सुरु गरेको बताएका छन् ।
उनले खेल क्षेत्र सुधारको लागि काम गरिरहेको बताएका हुन् । शनिवार शनिबार काठमाडौंमा आयोजित रामेछाप–काठमाडौं पत्रकार समाजको दोस्रो अधिवेशनलाई सम्बोधन गर्दै घिसिङले आफ्नो कार्यकालमा खेलकुदले फड्को मार्ने विश्वास व्यक्त गरेका छन् ।
घिसिङले खेलाडीको हितमा समेत ध्यान दिँदै एसियाली खेलकुद र राष्ट्रिय तथा अन्तर्राष्ट्रिय खेलकुदलाई प्राथमिकता दिएर काम गर्ने बताएका हुन् । उनले भने,‘खेलाडीलाई चलायमान बनाउनु पर्छ, जसरी युद्ध भएपछि आर्मी थपौंला, भर्ति गरौंला, तालिम गरौंला भनेर हुँदैन त्यसरी नै खेलमा फाइट गर्न खेलाडीलाई नियमित अभ्यास आवश्यक पर्छ ।
राजधानी काठमाडौबाट नजिक भएर पनि रामेछापको अझै विकासको दृष्टिले पछाडि परेको बताउदै विगतमा सडकले नछोएको समयमा जिल्लालाई रामेछापलाई सुगम घोषणा गर्नाले विकासमा पछाडि परेको र संघर्ष गरिरहनु परेको बताएका छन् ।
उनले रामेछाप जिल्लाभित्र खेलकुद क्षेत्रको विकासका लागि आफू प्रतिबद्ध रहेको बताउदै खेलकुदको पूर्वाधार निर्माणमा विशेष ध्यान दिने बताएका छन् ।
