काठमाडाैँ । रामेछाप जिल्लामा कांग्रेसले गाउँपालिका अध्यक्षमा खाता खोलेको छ ।
जिल्लाको गोकुलगंगा गाउँपालिकामा नेपाली कांग्रेसका युवा उम्मेदवार तथा नेपाल तरुणदलका रामेछाप जिल्ला सभापति समेत रहेका काजीबहादुर खड्का (दिनेश) गाउँपालिकाको अध्यक्षमा अत्यधिक मतका साथ विजयी भएका छन् । उनले नेकपा एमालेका उम्मेदवार खड्ग बहादुर सुनुवारलाई पराजित गर्दै विजयी भएका हुन् । त्यसैगरी उपाध्यक्षमा पनि नेपाली कांग्रेसकै उषा वस्नेत कार्की विजयी भएकी छिन् ।
उनले एमालेबाट उपाध्यक्षकी उम्मेदवार राधिका श्रेष्ठ नेवारलाई पछि पार्दै विजयी भएकी हुन् । गत निर्वाचनमा अध्यक्ष र उपाध्यक्ष नै नेकपा एमालेले जितेको थियो । गत निर्वाचनमा जितेकै आधारमा एमालेले खड्ग बहादुर सुनुवार र राधिका श्रेष्ठ नेवारलाई पुनः उम्मेदवार बनाएको थियो । ६ वटा वडा रहेको गोकुलगंगा गाउँपालिकामा चार वटा वडामा न एपली कांग्रेस र दुई वटा वडामा नेकपा एमालेले विजयी हासिल गरेको छ ।
मतगणना सम्पन्न भएपनि निर्वाचन अधिकृतको कार्यालय गोकुलगंगा गाउँपालिकाले औपचारिक घोषणा गर्न भने बाँकी छ । औपचारिक घोषणाको प्रतिक्षामा बसेका कांग्रेसका नेता कार्यकर्ताहरु विजयी जुलुस निकाल्ने तयारीमा रहेको जानकारी दिएका छन् ।
