काठमाडौं । युक्रेनको मारिउपोल शहर बाहिर नयाँ सामूहिक चिहानहरू फेला परेका छन् ।
मारिउपोलको पश्चिमी क्षेत्रमा रहेको मनहुश शहरमा २ सय भन्दा बढी नयाँ सामुहिक चिहान फेला परेको युक्रेनी अधिकारीहरूले दाबी गरेका छन् ।
उनीहरूले युक्रेनी नागरिकहरू विरुद्ध रूसी युद्ध अपराधको बढ्दो प्रमाण रहेको बताएका छन् ।
अमेरिकी स्याटेलाइट इमेजरी कम्पनी म्याक्सर टेक्नोलोजीद्वारा सङ्कलन र विश्लेषण गरिएको तस्बिरका आधारमा यो दाबी गरिएको अन्तराष्ट्रिय सञ्चारमाध्यमले जनाएका छन् ।
युक्रेनी अधिकारीहरूका अनुसार मार्च १ मा रुसी सेनाले घेरेपछि लगातार बमबारी भइरहेको मारिउपोलमा करिब १ लाख मानिस फसेका छन् ।
आक्रमणमा परि हालसम्म २० हजार भन्दा बढी व्यक्तिको मृत्यु भएको युक्रेनी अधिकारीहरूले जनाएका छन् ।
रूसी सेनाले ट्रकमा बन्दरगाह सहरबाट शवहरू सङ्कलन गरी मनहुश शहरमा सामूहिक चिहानहरूमा विस्थापित गरेको युक्रेनले दाबी गरेको छ । शवहरू शहरमा सङ्कलनका लागि छोडिएको तस्बीर सामाजिक सञ्जालमा देखाइएको छ ।
रुस र युक्रेन दुवै देशले मारिउपोल शहर आ–आफ्नो नियन्त्रणमा रहेको दाबी गरिरहेकै समयमा चिहानहरु फेला परेका हुन् ।
युक्रेनी राष्ट्रपति भ्लाेदाेमिर जेलेन्स्की रुसी घेराबन्दीलाई आतंकवादी कारबाहीसँग तुलना गर्नुभएको छ । मारिउपोलमा हजारौं नागरिक रुसको नाकाबन्दीमा परेको भन्दै जेलेन्स्किले उनीहरूलाई सुरक्षित रूपमा बाहिर निकाल्ने प्रयास भइरहेको उहाँकाे भनाइ छ ।
यसैबीच, युक्रेनी अधिकारीहरूले डोनेट्स्क र लुहान्स्क र डोनबासमा रुस र युक्रेनी सेनाबीच भिषण लडाईं भइरहेको छ । पछिल्लो २४ घण्टाको अवधिमा डोनेट्स्क क्षेत्रमा थप ४२ बस्ती रुसी नियन्त्रणमा आएको राष्ट्रपति कार्यालयले जनाएको छ ।
