भक्तपुर । आठ दिन नौ रातसम्म चल्ने भक्तपुरको बिस्का जात्राको चौथो दिन आज बुधबार लिङ्गो उभ्याईंदैछ ।
आज मध्यान्ह तालाक्वस्थित कुमाले टोलमा करिब ४० हात लामो हात नभएको लिङ्गो र साँझ भेलुखेलस्थित योसिंखेलमा करिब ५५ हात लामो लिङ्गो उभ्याईने परम्परा छ ।
स्थानीय प्रजापति समुदायले विधिवत पुजा गरेर मध्यान्ह हात नभएको लिङगो उभ्याउने र तान्त्रिक विधिपूर्वक दशकर्म विधान गरी योसिंखेलमा आज साँझ लिङ्गो उभ्याइने छ ।
प्रजापति समुदायले आज उभ्याएको लिङ्गोलाई जात्राका अन्तिम दिन अर्थात बैशाख ५ गते बिहान ढालिन्छ भने जात्राको पाँचौं दिन अर्थात नयाँ वर्ष वैशाख १ गतेका दिन ५५ हाते लामो लिङ्गो ढालिन्छ ।
यसैबीच मध्यपुरको बोडेस्थित महालक्ष्मी मन्दिर प्रांगणमा पनि आज बिहानै योसिं द्यो अर्थात लिङ्गो उभ्याउने गरिन्छ । यहाँ लिङ्गो उठाएपछि जिब्रो छेड्ने व्यक्तिको ब्रत शुरु हुने र बैशाख २ गते जिब्रो छेडेपछि मात्रै ब्रत समाप्त हुने परम्परा रहेको छ ।
भक्तपुरको बिस्का जात्रामा योसिंद्यो अर्थात लिङ्गो उभ्याउने र ढाल्ने जात्राको प्रमुख आकर्षक हो ।
यो जात्रा हेर्दा शत्रुनाश हुने जनविश्वास रहेकाले भक्तपुर नगर र यसको वरिपरि रहेका गाउँमात्र होइन काठमाडौं, ललितपुर, काभ्रे, नुवाकोट र धादिङका सर्वसाधारणसमेत बिस्केट जात्रा हेर्न भक्तपुर पुग्ने गर्छन् ।
