काठमाडौं । अर्थमन्त्री जनार्दन शर्माले नेपाल राष्ट्र बैंकका गभर्नर महाप्रसाद अधिकारीको निलम्बन राष्ट्र बैंकको ऐन अनुसार भएको दाबी गर्नुभएको छ ।
अर्थ मन्त्रालयमा सोमबार पत्रकार सम्मेलन गर्दै मन्त्री शर्माले राष्ट्र बैंकका गभर्नर अधिकारीको निलम्बन राष्ट्र बैंकको ऐन अनुसार भएको बताउनुभएको हो । उहाँले सरकारले राष्ट्र बैंकको ऐन कानून अनुसार कारबाही गरेकाले त्यो कानून सम्मत भएको तर्क गर्नुभयो ।
‘नेपाल राष्ट्र बैंकको गभर्नर निलम्बनको राष्ट्र बैंकको ऐन अनुसार कारबाही गरिएको हो । यो कानुन सम्वत कुरा नै हो, किन गरियो भन्ने बारेमा गभर्नरलाई छानविन गर्न एउटा समिति बनाएका छौं,’ उहाँले भन्नुभयो, ‘समितिले छानविन गरेर हामीलाई प्रतिवेदन दिनेछ, त्यो प्रतिवेदनले यी सबै प्रश्नको जवाफ दिनेछ ।’
मन्त्री शर्माले गभर्नर किन निलम्बन गरियो भन्ने विषयमा छानविन समितिले छानविन प्रतिवेदन आएपछि थाहा हुने बताउनुभयो । उहाँले छानविन समिति बनाएकाले अहिले छानविन समितिलाई काम गर्न दिनुपर्ने बताउनुभयो ।
मन्त्री शर्माले राष्ट्र बैंकले लक्ष्यभन्दा बढी कर्जा प्रवाह गर्न दिएर नियन्त्रण गर्न नसकेको आरोप लगाउनुभयो ।
‘कर्जा प्रवाह १९ प्रतिशत लक्ष्य राखिएकोमा ३२ प्रतिशतसम्म पुग्यो,’ उहाँले भन्नुभयो, ‘यसलाई समयमा नै नियन्त्रण गर्नुपर्ने हो कि होइन ? यो काम अर्थ मन्त्रालयले गदैन राष्ट्र बैंककै काम हो ।’
